കൊളച്ചേരി: മധുരം നല്‍കിയും കൊടിതോരണങ്ങള്‍ അണിയിച്ചൊരുക്കിയും നാടും നഗരവും സ്വാതന്ത്ര്യ ദിനം ആഘോഷിക്കുമ്പോള്‍ ഇന്നത്തെ ദിവസം സ്വന്തം സുഹൃത്തിന്റെ ചികിത്സയ്ക്കു വേണ്ടിയുള്ള സാന്ത്വന യാത്രയ്ക്കു വേണ്ടി മാറ്റിവച്ചുകൊണ്ട് ഒരു ഓട്ടോ ഡ്രൈവര്‍ വ്യത്യസ്തനാവുന്നു. കൊളച്ചേരി പള്ളിപ്പറമ്പിലെ നൗഷാദ് ആണ് കാരുണ്യത്തിന്റെ പുതിയ മാതൃക സൃഷ്ടിക്കുന്നത്. സ്വാതന്ത്ര്യദിനമായ ഇന്നു നൗഷാദിന്റെ ഓട്ടോ നിരത്തിലിറങ്ങുന്നത് സ്വന്തം കീശ നിറയ്ക്കാനല്ല, മറിച്ച് ഇരു വൃക്കകള്‍ക്കും അസുഖം ബാധിച്ച് ചികിത്സയില്‍ കഴിയുന്ന തന്റെ കൂട്ടുകാരന്റെ ചികിത്സയ്ക്ക് പണം കണ്ടെത്തുന്നതിനുവേണ്ടിയാണ്.
ആഴ്ചയില്‍ മൂന്നു ദിവസവും ഡയാലിസിസിനു വിധേയനാകുന്ന സുഹൃത്തിനു ഭീമമായ തുകയാണ് ചികിത്സയ്ക്കായി വേണ്ടി വരുന്നത്. ഓട്ടോ ഓടിച്ചു ലഭിക്കുന്ന മുഴുവന്‍ വരുമാനവും കൂട്ടുകാരനു നല്‍കാനാണ് നൗഷാദിന്റെ തീരുമാനം.
ഇതിനു വേണ്ടി ഓട്ടോറിക്ഷയില്‍ ഭണ്ഡാരവും സ്ഥാപിച്ചു. സ്വാതന്ത്ര്യദിനത്തില്‍ സമൂഹത്തിനു ഉപകാരപ്രദമായ എന്തെങ്കിലും നന്മ ചെയ്യണമെന്ന ചിന്തയാണ് ഇത്തരമൊരു പ്രവൃത്തിക്ക് തന്നെ പ്രേരിപ്പിച്ചതെന്ന് നൗഷാദ് പറഞ്ഞു. അഞ്ചു വര്‍ഷത്തെ പ്രവാസ ജീവിതത്തിനു ശേഷം മൂന്നുമാസം മുമ്പാണ് നൗഷാദ് ഓട്ടോ ഡ്രൈവറുടെ കുപ്പായമണിഞ്ഞത്.