കോഴിക്കോട്: ജില്ലയിലെ വിവിധ സ്ഥലങ്ങളില്‍ വില്‍പനയ്ക്കായി കൊണ്ടുവന്ന അഞ്ചുലക്ഷത്തോളം രൂപയുടെ നിരോധിത പുകയില ഉല്‍പന്നങ്ങള്‍ പിടികൂടി. സംഭവവുമായി ബന്ധപ്പെട്ട് മലപ്പുറം വള്ളുവമ്പ്രം അത്താണിക്കല്‍ സ്വദേശി ബിജേഷ് (38), കോഴിക്കോട് റെഡ്‌ക്രോസ് പടിഞ്ഞാറെ കൊട്ടുക്കണ്ടി സ്വദേശി വിനിരാജ് (29) എന്നിവരെ അഴ്ചവട്ടത്തുള്ള വിദ്യാഭ്യാസ സ്ഥാപനത്തിനടുത്തുവച്ച് പൊലിസ് പിടികൂടി. 100 കിലോയോളം വരുന്ന നിരോധിത പുകയില ഉല്‍പന്നങ്ങളാണ് ഇവരില്‍നിന്ന് പിടികൂടിയത്.
ജില്ലാ പൊലിസ് മേധാവി കാളി രാജ് മഹേഷ് കുമാറിന്റെ നിര്‍ദേശപ്രകാരം കോഴിക്കോട് നഗരത്തിലെ വിദ്യാഭ്യാസ സ്ഥാപനങ്ങളുടെ സമീപത്തെ കടകള്‍ കേന്ദ്രീകരിച്ച് സിറ്റി ആന്റി നാര്‍ക്കോട്ടിക് സ്‌ക്വാഡ് നടത്തിയ പരിശോധനയിലാണ് ഇവര്‍ വലയിലായത്. വിനിരാജാണ് കടകളില്‍ ഹാന്‍സ് എത്തിക്കുന്നതെന്ന രഹസ്യവിവരം പൊലിസിന് ലഭിച്ചിരുന്നു. ഇതിന്റെ അടിസ്ഥാനത്തില്‍ വിനിരാജിനെ പൊലിസ്് നിരീക്ഷിച്ചുവരികയായിരുന്നു.
ഇയാളെ കേന്ദ്രീകരിച്ച് നടത്തിയ അന്വേഷണത്തില്‍ സുഹൃത്തായ മലപ്പുറം സ്വദേശി ബിജേഷ് എന്ന ആളാണ് ഹാന്‍സ് എത്തിച്ചുനല്‍കുന്നതെന്ന് മനസിലാക്കിയ പൊലിസ് മഫ്ത്തിയില്‍ ഇവരെ പിന്തുടരുകയായിരുന്നു. കസബ എസ്.ഐ സിജിത്തിന്റെ നേതൃത്വത്തിലുള്ള പൊലിസും സിറ്റി ആന്റി നാര്‍കോട്ടിക്ക് സ്‌ക്വാഡും ചേര്‍ന്ന് ഇവര്‍ യാത്ര ചെയ്തിരുന്ന കാര്‍ തടഞ്ഞുനിര്‍ത്തി പരിശോധിച്ചപ്പോള്‍ 6 ചാക്കുകളിലായി 100 കിലോയോളം ഹാന്‍സ്, കൂള്‍ലിപ്പ് എന്നിവ പിടികൂടുകയായിരുന്നു.
നിരോധിത പുകയില ഉല്‍പന്നങ്ങള്‍ വില്‍പന നടത്തിയതിന് ഇവര്‍ക്കെതിരേ വിവിധ സ്റ്റേഷനുകളില്‍ കേസുണ്ട്. കോഴിക്കോട് സിറ്റിയില്‍ ആദ്യമായാണ് ഇത്രയധികം നിരോധിത പുകയില ഉല്‍പന്നം പിടികൂടുന്നത്. ഇവരെ ചോദ്യംചെയ്തതില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ കോഴിക്കോട് നഗരം കേന്ദ്രീകരിച്ച് മറ്റു പലരും ഇത്തരം കച്ചവടം നടത്തുന്നതായി പൊലിസിന് വിവരം ലഭിച്ചിട്ടുണ്ട്. ഇവര്‍ക്കെതിരേ അന്വേഷണം ആരംഭിച്ചതായി പൊലിസ് അറിയിച്ചു. കച്ചവടത്തില്‍നിന്ന് ലഭിക്കുന്ന ലാഭം ഉപയോഗിച്ച് ടാഗോര്‍ ഹാളിന് സമീപം ഹോട്ടല്‍ തുടങ്ങാനിരിക്കുകയായിരുന്നു ഇവരെന്നാണ് പൊലിസിന് ലഭിച്ച വിവരം.