കോഴിക്കോട്: ഓഖി ദുരന്തത്തില്‍പ്പെട്ട് മരിച്ച ആറു മത്സ്യത്തൊഴിലാളികളുടെ മൃതദേഹം കൂടി കണ്ടെത്തി. മത്സ്യബന്ധനത്തിന് പോയ മത്സ്യത്തൊഴിലാളികളാണ് ബേപ്പൂരില്‍ നിന്ന് 11 നോട്ടിക്കല്‍ മൈല്‍ അകലെ മൃതദേഹങ്ങള്‍ കണ്ടെത്തിയത്. ഇതോടെ മരണസംഖ്യ 74 ആയി.

ഇന്നലെ 12 മൃതദേഹങ്ങള്‍ കണ്ടെത്തിയിരുന്നു. ബേപ്പൂരില്‍നിന്ന് എട്ടും കാപ്പാട്, പൊന്നാനി, എറണാകുളം കണ്ണമാലി, കൊടുങ്ങല്ലൂര്‍ അഴീക്കോട് എന്നിവിടങ്ങളില്‍നിന്ന് ഓരോ മൃതദേഹങ്ങളുമാണ് ഇന്നലെ ലഭിച്ചത്. ബേപ്പൂരില്‍ നിന്ന് തിങ്കളാഴ്ചയും എട്ട് മൃതദേഹങ്ങള്‍ കിട്ടിയിരുന്നു.

മത്സ്യത്തൊഴിലാളികളെ ഉള്‍പ്പെടുത്തി ബേപ്പൂര്‍ മേഖലയില്‍ കൂടുതല്‍ തിരച്ചില്‍ നടത്താന്‍ ആലോചിക്കുന്നുണ്ട്.