ബാങ്കോക്ക്: ഉത്തര കൊറിയയുമായി ഉപാധികളില്ലാത്ത ചര്‍ച്ചയ്ക്കു സന്നദ്ധത അറിയിച്ച് അമേരിക്ക. അമേരിക്കന്‍ സ്റ്റേറ്റ് സെക്രട്ടറി റെക്‌സ് ടില്ലേഴ്‌സനാണ് ചര്‍ച്ചയ്ക്കു സന്നദ്ധത അറിയിച്ചത്. ഉ.കൊറിയന്‍ വിഷയത്തിലുള്ള അമേരിക്കയുടെ പ്രത്യേക ദൂതനായ ജോസഫ് യുന്‍ ആണ് ഇക്കാര്യം അറിയിച്ചത്.
വിഷയത്തില്‍ വൈറ്റ് ഹൗസ് തുടര്‍ന്നുവരുന്ന സമീപനങ്ങളുടെ കീഴ്‌മേല്‍ മറിച്ചിലാണ് ടില്ലേഴ്‌സന്റെ നിലപാട്. ടില്ലേഴ്‌സന്റെ വാഗ്ദാനം ഉ.കൊറിയ സ്വീകരിക്കുമെന്നാണു പ്രതീക്ഷയെന്ന് ജോസഫ് യുന്‍ തായ്‌ലന്‍ഡ് തലസ്ഥാനമായ ബാങ്കോക്കില്‍ മാധ്യമങ്ങളോടു പറഞ്ഞു. ഒരുതരത്തിലുമുള്ള മുന്നുപാധികളില്ലാതെ അമേരിക്ക ചര്‍ച്ചയ്ക്കു തയാറാണ്. ചര്‍ച്ചയിലൂടെയും സമ്മര്‍ദത്തിലൂടെയും ഉ.കൊറിയയുടെ ആണവ പദ്ധതികളെ നിര്‍ത്തലാക്കുക എന്ന ദ്വിമുഖ സമീപനമാണ് വിഷയത്തില്‍ തങ്ങള്‍ തുടരുന്നതെന്നും അദ്ദേഹം അറിയിച്ചു. ജപ്പാന്‍, തായ്‌ലന്‍ഡ് എന്നിവിടങ്ങളില്‍ സന്ദര്‍ശനത്തിനായി എത്തിയതായിരുന്നു യുന്‍.
ഉ.കൊറിയയുമായി തുറന്ന ചര്‍ച്ച വേണമെന്ന നിലപാടാണ് ടില്ലേഴ്‌സനുള്ളത്. ഇതിന് അവര്‍ തയാറാകുമെന്നാണു പ്രതീക്ഷ. അവരുടെ പ്രതികരണത്തിനായി കാത്തിരിക്കുന്നു-ജോസഫ് യുന്‍ കൂട്ടിച്ചേര്‍ത്തു. അതിനിടെ, ഉ.കൊറിയന്‍ വിഷയത്തില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപും റഷ്യന്‍ പ്രസിഡന്റ് വഌദ്മിര്‍ പുടിനും ഫോണില്‍ സംസാരിച്ചതായാണു വിവരം. ഉ.കൊറിയയിലെ വളരെ ഭീതിതമായ സ്ഥിതിഗതികള്‍ പരിഹരിക്കാനായി ഇരുനേതാക്കളും ചര്‍ച്ച നടത്തിയതായി വൈറ്റ് ഹൗസ് വാര്‍ത്താകുറിപ്പില്‍ അറിചിച്ചു. അമേരിക്കയുടെ സാമ്പത്തിക പ്രകടനത്തെ തന്റെ വാര്‍ഷിക വാര്‍ത്താസമ്മേളനത്തില്‍ അഭിനന്ദിച്ച പുടിന്റെ നടപടിയില്‍ ട്രംപ് നന്ദി രേഖപ്പെടുത്തിയതായും കുറിപ്പില്‍ പറയുന്നു.