ലഖ്‌നൗ: ഗുജറാത്തില്‍ ബി.ജെ.പിയുടെ വിജയം കഷ്ടിച്ച് രക്ഷപ്പെടലെന്ന് സമാജ് വാദി പാര്‍ട്ടി പ്രസിഡന്റ് അഖിലേഷ് യാദവ്. ജനരോഷം കുറച്ചുകൂടി വോട്ടായി മാറിയിരുന്നെങ്കില്‍ ഫലം മറ്റൊന്നാകുമായിരുന്നുവെന്നും അഖിലേഷ് പറഞ്ഞു. ട്വിറ്ററിലൂടെയായിരുന്നു മുന്‍ ഉത്തര്‍പ്രദേശ് മുഖ്യമന്ത്രിയുടെ പരാമര്‍ശം.
ഗുജറാത്തിലെ ഫലം കാണിക്കുന്നത് അവിടെ ബി.ജെ.പി കഷ്ടിച്ച് രക്ഷപ്പെട്ടുവെന്നാണ്. വളരെ താഴ്ന്ന മാര്‍ജിനിലുള്ള വിജയം അവര്‍ പാവങ്ങളോടും ഗ്രാമീണരോടും കാണിക്കുന്ന പുച്ഛത്തിന്റെ ഫലമാണ്.
കോണ്‍ഗ്രസിന്റെ പരാജയം മാറ്റിനിര്‍ത്തിയാല്‍ അവരുടെ സഖ്യകക്ഷികളായ അല്‍പേഷ് താക്കൂറിന്റെയും ഹാര്‍ദിക് പട്ടേലിന്റെയും ജിഗ്നേഷ് മേവാനിയുടെയും വിജയം വളരെ വലുതാണ്. 2019ല്‍ എല്ലാ രാഷ്ട്രീയ പാര്‍ട്ടികളുമായും സഖ്യമുണ്ടാക്കി ഇതേ തന്ത്രവുമായി കോണ്‍ഗ്രസ് ബി.ജെ.പിക്കെതിരായി രംഗത്തിറങ്ങണമെന്നും അഖിലേഷ് ആവശ്യപ്പെട്ടു.