തൃപ്രയാര്‍: വലപ്പാട് ബീച്ച് ചിത്ര ഓഡിറ്റോറിയത്തില്‍ നടന്ന വിവാഹ സത്കാരത്തിനിടെ നടന്ന അക്രമവുമായി ബന്ധപ്പെട്ട് 6 ആറു പേരെ വലപ്പാട് പൊലിസ് അറസ്റ്റ് ചെയ്തു. വലപ്പാട് വേളയില്‍ വിപിന്‍ (26), തളിക്കുളം തമ്പാന്‍കടവ് കുഞ്ഞാത്തന്‍ വീട്ടില്‍ ഹരികൃഷ്ണന്‍(21), ഇത്തിക്കാട്ട് അപ്പു (21), തമ്പാന്‍കടവ് കുട്ടന്‍പറമ്പത്ത് മണികണ്ഠന്‍ (23), ചക്കുംകോരന്‍ വിജില്‍ (19), ഇത്തിക്കാട്ട് ഷിജോയ് എന്ന കണ്ണന്‍ (21) എന്നിവരെയാണ് എസ്.ഐ ഇ.ആര്‍ ബൈജുവിന്റെ നേതൃത്വത്തില്‍ പൊലിസ് അറസ്റ്റ് ചെയ്തത്.

പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു. വിവാഹസത്കാരത്തിനിടയിലെ ഭക്ഷണം വിളമ്പുന്നത് സംബന്ധിച്ചുണ്ടായ തര്‍ക്കമാണ് ഇരുവിഭാഗങ്ങള്‍ തമ്മിലുള്ള അടിയില്‍ കലാശിച്ചത്. ഇരുപത്തിനാലു പേരടങ്ങുന്ന സംഘം കാറ്ററിംഗുകാരെ അക്രമിക്കുകയായിരുന്നു. പിന്നീട് തിരിച്ചും അക്രമണം നടന്നു. സംഭവത്തില്‍ ഇരുപത്തിനാലുപേര്‍ക്കെതിരെ വധശ്രമത്തിന്ന് വലപ്പാട് പൊലിസ് കേസെടുത്തിരുന്നു. സംഭവത്തില്‍ ഇരുഭാഗത്തുനിന്നുമായി ഇതുവരെ പന്ത്രണ്ട് പ്രതികളെ പിടികൂടിയിട്ടുണ്ട്.