ന്യൂഡല്‍ഹി: പ്രധാനമന്ത്രി നരേന്ദ്ര മോദിയെ പരോക്ഷമായി പരിഹസിച്ചുകൊണ്ട് മുതിര്‍ന്ന കോണ്‍ഗ്രസ് നേതാവ് മനീഷ് തിവാരിയുടെ ട്വീറ്റ്. ക്രിസ്മസ് അപ്പൂപ്പനുമായി താരതമ്യം ചെയ്താണ് അദ്ദേഹം മോദിയെ പരിഹസിച്ചത്.
'ലോകമെമ്പാടും ഈ സമയത്ത് വെളുത്ത താടിയുള്ള പ്രായമായ ഒരാള്‍ നിങ്ങളുടെ വീടുകളിലേക്ക് പതുങ്ങിക്കയറുകയും നിങ്ങളുടെ സോക്‌സുകളില്‍ പണം നിക്ഷേപിക്കുകയും ചെയ്യും'ഇന്ത്യയില്‍ പ്രായമായ, വെളുത്ത താടിയുള്ള ഒരാള്‍ ടെലിവിഷനിലൂടെ നിങ്ങളുടെ വീടുകളില്‍ നുഴഞ്ഞുകയറുകയും നിങ്ങളുടെ പോക്കറ്റുകളിലും അലമാരയിലും പണപ്പെട്ടിയിലുമുള്ള പണം എടുത്തുമാറ്റുകയും സോക്‌സ് മാത്രമായി അവശേഷിപ്പിക്കുകയും ചെയ്യും എന്നാണ് പരിഹസിച്ചത്.
എന്നാല്‍ ഇത് വലിയതോതില്‍ ചര്‍ച്ച ചെയ്യപ്പെട്ടതോടെ പുതിയ ഇന്ത്യക്കായി നല്ല വാര്‍ത്തകള്‍ കൊണ്ടുവരുന്ന സാന്റാ ക്ലോസാണ് പ്രധാനമന്ത്രി മോദിയെന്ന് പാര്‍ലമെന്ററി കാര്യമന്ത്രി അനന്ത് കുമാര്‍ വിശദീകരണവുമായി രംഗത്തെത്തി.
കഴിഞ്ഞ മൂന്നര വര്‍ഷമായി ഇന്ത്യയിലെ ജനങ്ങള്‍ക്കു വേണ്ടി പ്രധാനമന്ത്രി കഠിനാദ്ധ്വാനം ചെയ്യുകയാണ്. പുതിയ ഇന്ത്യക്കായി നല്ല വാര്‍ത്തകള്‍ കൊണ്ടുവരുന്ന പുതിയ സാന്റയാണ് നമോയെന്നും മന്ത്രി കൂട്ടിച്ചേര്‍ത്തു.