കോഴിക്കോട്: ഭിന്നലിംഗക്കാര്‍ക്ക് കോഴിക്കോട് പൊലിസിന്റെ ക്രൂരമര്‍ദ്ദനമെന്ന് പരാതി. സംസ്ഥാന തുടര്‍വിദ്യാഭ്യാസ കലോത്സവത്തിന് എത്തിയവര്‍ക്കാണ് മര്‍ദ്ദമേറ്റത്. പരുക്കേറ്റവരെ ബീച്ച് ആശുപത്രിയില്‍ പ്രവേശിപ്പിച്ചു.

കോഴിക്കോട് സ്വദേശികളായ മമതാ ജാസ്മിന്‍, സുഷ്മി എന്നിവര്‍ക്കാണ് മര്‍ദ്ദനമേറ്റത്. കാലിലും ശരീരത്തിലും അടിയേറ്റ പാടുകളുണ്ട്. ഇന്നലെ രാത്രിയോടെ മിഠായിത്തെരുവില്‍വെച്ച് പൊലിസ് വാഹനമെത്തി തടഞ്ഞുവെക്കുകയും പിന്നീട് ചോദ്യം ചെയ്തതിനു ശേഷം ലാത്തി കൊണ്ട് അടിക്കുകയുമായിരുന്നുവെന്ന് പരിക്കേറ്റവര്‍ പറഞ്ഞു.

കസബ പൊലിസാണ് മര്‍ദ്ദിച്ചതെന്നാണ് ഇവര്‍ പറയുന്നത്. സംഭവത്തില്‍ ജില്ലാ കലക്ടര്‍ക്കും കമ്മിഷണര്‍ക്കും മനുഷ്യാവകാശ കമ്മിഷനും പരാതി നല്‍കാനൊരുങ്ങുകയാണ് ഇരുവരും. എന്നാല്‍ കസബ പൊലിസ് സംഭവം നിഷേധിച്ചു.