മുംബൈ: ദക്ഷിണാഫ്രിക്കന്‍ പര്യടനത്തിനായി ഇന്ത്യന്‍ ക്രിക്കറ്റ് ടീം യാത്ര തിരിച്ചു. ബുധനാഴ്ച രാത്രി മുംബൈയില്‍ നിന്നാണ് ടീം യാത്ര പുറപ്പെട്ടത്. മൂന്ന് ടെസ്റ്റ് മത്സരങ്ങളടങ്ങിയ പരമ്പരയും ആറ് ഏകദിന പോരാട്ടങ്ങളടങ്ങിയ പരമ്പരയും മൂന്ന് ടി20 മത്സരങ്ങളുടെ പരമ്പരയുമാണ് ഇന്ത്യ കളിക്കുക. ആദ്യ ടെസ്റ്റ് ജനുവരി അഞ്ചിന് കേപ് ടൗണില്‍ തുടങ്ങും.
ആത്മവിശ്വാസത്തോടെയാണ് ഇന്ത്യ ദക്ഷിണാഫ്രിക്കന്‍ പര്യടനത്തിനൊരുങ്ങിയതെന്ന് ക്യാപ്റ്റന്‍ വിരാട് കോഹ്‌ലി പറഞ്ഞു. ടീം സന്തുലിതമാണ്. എല്ലാ കാലാവസ്ഥയിലും കളിച്ച് ശീലിച്ച താരങ്ങളാണ് ടീമിലുള്ളതെന്നും നായകന്‍ വ്യക്തമാക്കി. പരുക്കേറ്റതിനാല്‍ ശിഖര്‍ ധവാന്‍ ആദ്യ ടെസ്റ്റില്‍ കളിച്ചേക്കില്ല. കോഹ്‌ലിക്കൊപ്പം ഭാര്യയും ബോളീവുഡ് താരവുമായി അനുഷ്‌ക ശര്‍മയും ദക്ഷിണാഫ്രിക്കയിലേക്ക് യാത്ര തിരിച്ചിട്ടുണ്ട്.