കെയ്‌റോ: ഈജിപ്ഷ്യന്‍ തലസ്ഥാനമായ കെയ്‌റോയിലെ കോപ്റ്റിക് ചര്‍ച്ചില്‍ വെടിവയ്പ്പ്. ആക്രമണത്തില്‍ അഞ്ചു പേര്‍ കൊല്ലപ്പെട്ടതായി ഈജിപ്ത് ആരോഗ്യമന്ത്രാലയം അറിയിച്ചു.

ദക്ഷിണ കെയ്‌റോയിലെ ഹാല്‍വാന്‍ നഗരത്തിലുള്ള മാര്‍മിന ചര്‍ച്ചിലാണ് സംഭവം. ചര്‍ച്ചിനുള്ളിലേക്ക് അതിക്രമിച്ചു കടന്ന തോക്കുധാരി വെടിയുതിര്‍ക്കുകയായിരുന്നു. അകത്തേക്കു പ്രവേശിക്കുന്നതിനിടെ വെടിയുതിര്‍ക്കുകയും അഞ്ച് സുരക്ഷാ ഉദ്യോഗസ്ഥര്‍ക്ക് വെടിയേല്‍ക്കുകയും ചെയ്തു.

പിന്നീട് സുരക്ഷാ സൈന്യം തോക്കുധാരിയെ വധിക്കുകയും ചെയ്തു.

കൊല്ലപ്പെട്ടയാളെ കൂടാതെ മറ്റൊരു അക്രമി കൂടി ഉണ്ടായിരുന്നുവെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. കൊല്ലപ്പെട്ടവരില്‍ പൊലിസുകാരും ഉള്‍പ്പെട്ടിട്ടുണ്ടെന്നാണ് വിവരം.

അക്രമികളെക്കുറിച്ചോ മറ്റോ വിവരം ലഭ്യമായിട്ടില്ല. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടുമില്ല.

ഈ വര്‍ഷം ഈജിപ്തിലെ കോപ്റ്റിക് ചര്‍ച്ച് കേന്ദ്രീകരിച്ച് നിരവധി ആക്രമണങ്ങളാണ് ഭീകരസംഘടനയായ ഐ.എസ് നടത്തിയത്. മേയില്‍ നടത്തിയ ആക്രമണത്തില്‍ 29 പേര്‍ കൊല്ലപ്പെട്ടിരുന്നു. കുരുത്തോല പെരുന്നാള്‍ ദിവസത്തില്‍ നടത്തിയ ആക്രമണത്തില്‍ 44 പേരും കൊല്ലപ്പെട്ടിരുന്നു.