റിയാദ്: ഇന്ത്യന്‍ ചെസ്സ് ഇതിഹാസം വിശ്വനാഥന്‍ ആനന്ദിന് ലോക റാപിഡ് ചെസ്സ് ചാംപ്യന്‍ഷിപ്പ് കിരീടം. സഊദി അറേബ്യയിലെ റിയാദില്‍ നടന്ന പോരാട്ടത്തില്‍ റഷ്യന്‍ ഗ്രാന്‍ഡ് മാസ്റ്റര്‍ വ്‌ളാദിമിര്‍ ഫെഡോസീവിനെ ടൈ ബ്രേക്കര്‍ പോരാട്ടത്തില്‍ വീഴ്ത്തിയാണ് ആനന്ദിന്റെ കിരീട ധാരണം. 14 വര്‍ഷങ്ങള്‍ക്ക് ശേഷമാണ് ആനന്ദ് റാപിഡ് ചെസ്സ് കിരീടം തിരിച്ചുപിടിക്കുന്നത്. നേരത്തെ 2003ലാണ് ഇന്ത്യന്‍ താരം അവസാനമായി റാപിഡിലെ ലോക കിരീടം സ്വന്തമാക്കിയത്. വനിതാ പോരാട്ടത്തില്‍ ചൈനയുടെ ജു വെന്‍ജുന്‍ കിരീടം നേടി.
15 റൗണ്ട് പോരാട്ടത്തില്‍ 10.5 പോയിന്റുകള്‍ നേടിയാണ് ആനന്ദിന്റെ പടയോട്ടം. ഒന്‍പതാം റൗണ്ടില്‍ ലോക ചാംപ്യന്‍ നോര്‍വെയുടെ മാഗ്നസ് കാള്‍സനെ വീഴ്ത്തി കരുത്ത് കാട്ടിയ ആനന്ദിന് അവസാന റൗണ്ടുകളില്‍ ഫെഡോസീവും ഒപ്പം മറ്റൊരു റഷ്യന്‍ താരം നെപോംനിയചിയും വെല്ലുവിളിയായി നിന്നു. ആനന്ദിനൊപ്പം ഇരു താരങ്ങള്‍ക്കും 10.5 പോയിന്റുകള്‍ ആയതോടെയാണ് മത്സരം ടൈ ബ്രേക്കറിലേക്ക് നീണ്ടത്. രണ്ട് ഗെയിമുകള്‍ അരങ്ങേറിയ ടൈ ബ്രേക്ക് പോരാട്ടത്തില്‍ ഫെഡോസീവിനെതിരേ രണ്ടിലും വിജയം പിടിച്ച് 2-0ത്തിന് പോയിന്റ് നേടിയാണ് ആനന്ദ് ചാംപ്യന്‍ പട്ടം ഉറപ്പാക്കിയത്. 15 റൗണ്ടുകളില്‍ ആറ് വിജയങ്ങളും ഒന്‍പത് സമനിലകളുമായാണ് ആനന്ദ് തന്റെ കാലം കഴിഞ്ഞിട്ടില്ലെന്ന് ലോകത്തെ ബോധ്യപ്പെടുത്തിയത്. ടൂര്‍ണമെന്റില്‍ തോല്‍വി അറിയാതെയാണ് ഇന്ത്യന്‍ ഇതിഹാസം കുതിച്ചത്. 2003ല്‍ റഷ്യന്‍ ഇതിഹാസം വ്‌ളാദിമിര്‍ ക്രാംനികിനെ പരാജയപ്പെടുത്തിയാണ് അവസാനമായി ആനന്ദ് റാപിഡ് കിരീടം ഉയര്‍ത്തിയത്.
കിരീടം നേടിയതില്‍ സന്തോഷമുണ്ട്. ഇത്തരമൊരു നിമിഷം പ്രതീക്ഷിച്ചതല്ല. നിരവധി റാപിഡ് ചെസ്സ് കിരീടങ്ങള്‍ ഞാന്‍ സ്വന്തമാക്കിയിട്ടുണ്ട്.
എന്നാല്‍ സമീപ കാലത്ത് കിരീട നേട്ടം സൃഷ്ടിക്കാന്‍ സാധിച്ചിരുന്നില്ല. മികച്ച പ്രകടനം പുറത്തെടുക്കണമെന്ന പ്രതീക്ഷയുമാണ് അവസാന റൗണ്ടുകളില്‍ മത്സരിച്ചത്. പക്ഷേ കിരീട നേട്ടത്തെപ്പറ്റി ചിന്തിച്ചിരുന്നില്ല. അപ്രതീക്ഷിതമാണ് ഈ വിജയം. കിരീടം നേടിയ ശേഷം ആനന്ദ് പ്രതികരിച്ചു.
ചാംപ്യന്‍ഷിപ്പില്‍ പങ്കെടുത്ത മറ്റ് ഇന്ത്യന്‍ താരങ്ങളായ പി ഹരികൃഷ്ണ 16ാം സ്ഥാനത്തും സൂര്യശേഖര്‍ ഗാംഗുലി 60ാം സ്ഥാനത്തും സന്തോഷ് ഗുജ്‌റതി വിദിത് 61ാമതും ബി വാദിഭന്‍ 65ാം സ്ഥാനത്തും എസ്.പി സേതുരാമന്‍ 96ാം സ്ഥാനത്തുമാണ് എത്തിയത്. വനിതാ പോരാട്ടത്തില്‍ മത്സരിച്ച ഇന്ത്യയുടെ ഹരിക ദ്രോണവല്ലി 19ാം സ്ഥാനത്തെത്തി.