തൃക്കാക്കരയിലെ നവകേരള സദസ്; ചായ കുടിക്കാന്‍ വന്ന കോണ്‍ഗ്രസ് പ്രവര്‍ത്തകരെ കരുതല്‍ തടങ്കലിലാക്കി പൊലിസ്

കൊച്ചി: നവകേരള സദസ് നടക്കാനിരിക്കെ തൃക്കാക്കരയില്‍ മൂന്ന് യൂത്ത് കോണ്‍ഗ്രസ് നേതാക്കളെ പൊലിസ് കരുതല്‍ തടങ്കലിലെടുത്തു. ചായ കുടിക്കാനെത്തിയ പ്രവര്‍ത്തകരായ പി.എ സുജിത്, സിന്റോ, ജിപ്‌സണ്‍ എന്നീ നേതാക്കളെയാണ് കസ്റ്റഡിയിലെടുത്തിരിക്കുന്നത്.

ഇന്ന് വൈകിട്ട് മൂന്നുമണിക്കാണ് തൃക്കാക്കര മണ്ഡലത്തിലെ നവകേരള സദസ്. എറണാകുളം ജില്ലയിലെ നാല് മണ്ഡലങ്ങളില്‍ മാറ്റിവയ്ക്കപ്പെട്ട നവകേരള സദസ്സ് ആണ് ഇന്നും നാളെയുമായി നടക്കുന്നത്.

പ്രതിപക്ഷത്ത് നിന്ന് വലിയ പ്രതിഷേധമുണ്ടാകാനുള്ള സാധ്യത കണക്കിലെടുത്ത് വന്‍ പൊലീസ് സുരക്ഷയാണ് പ്രദേശത്ത്. ഇതിന്റെ ഭാഗമായാണ് യൂത്ത് കോണ്‍ഗ്രസ് നേതാക്കളുടെ കസ്റ്റഡി. മുനിസിപ്പാലിറ്റിക്ക് സമീപത്തെ ഹോട്ടലില്‍ നിന്നാണ് ഇവരെ കസ്റ്റഡിയിലെടുത്തത്. പരിപാടിക്ക് ശേഷം മാത്രമേ ഇവരെ വിട്ടയയ്ക്കൂ എന്ന് പൊലീസ് അറിയിച്ചു.