കൊല്ലം: സംസ്ഥാന സ്‌കൂള്‍ കലോത്സവത്തിന്റെ രണ്ടാം ദിവസം കോഴിക്കോട് ജില്ലയെ മറികടന്ന് കണ്ണൂര്‍ ജില്ലാ ഒന്നാം സ്ഥാനത്തെത്തി. 292 പോയന്റാണ് ജില്ല ഇതുവരെ നേടിയത്. 287 പോയിന്റുമായി കോഴിക്കോടും കൊല്ലവും രണ്ടാം സ്ഥാനത്ത് ഉണ്ട്. ഹയര്‍ സെക്കന്‍ഡറി വിഭാഗം മത്സരങ്ങളാണ് കണ്ണൂര്‍ ജില്ലയെ പോയിന്റ് പട്ടികയില്‍ ഒന്നാമതെത്തിച്ചത്.

പാലക്കാട് ജില്ല അഞ്ചാം സ്ഥാനത്തും മലപ്പുറം ആറാം സ്ഥാനത്തുമാണ്. ജനപ്രിയ ഇനങ്ങളുടെ മത്സരം നടക്കുന്നതിനാല്‍ രണ്ടാം ദിനം സദസ് ഒഴിഞ്ഞ് കിടക്കുന്നില്ല. നാടോടി നൃത്തത്തിന്റെയും നാടകത്തിന്റെയും ഭരതനാട്യത്തിന്റെയും വേദികള്‍ കാണികളാല്‍ നിറഞ്ഞിരുന്നു. ഒന്നാം വേദിയില്‍ നിറഞ്ഞ സദസില്‍ ഒപ്പന പുരോഗമിക്കുകയാണ്.

ഹൈസ്‌കൂള്‍ വിഭാഗം വിദ്യാര്‍ത്ഥികളുടെ നാടന്‍പാട്ടും തിരുവാതിരക്കളിയും ബാന്‍ഡ്‌മേളവും നടക്കുന്നുണ്ട്. രാത്രി ആകുന്നതോടെ കൂടുതല്‍ കാണികള്‍ കലോത്സവനഗരിയിലേക്ക് എത്തുമെന്നാണ് മത്സരാര്‍ഥികളും സംഘാടകരും പ്രതീക്ഷിക്കുന്നത്.

സംസ്ഥാന സ്‌കൂള്‍ കലോത്സവം: കോഴിക്കോടിനെ പിന്നിലാക്കി കണ്ണൂരിന്റെ കുതിപ്പ്