മഞ്ചേരി: നഗരസഭയില്‍  പ്രധാനമന്ത്രി ആവാസ് യോജന ഭവന നിര്‍മാണ പദ്ധതിയുടെ പ്രാരംഭ നടപടികള്‍ക്കു തുടക്കമായി. ഇതിന്റെ ഭാഗമായി 20 മുതല്‍ 25വരെ  കുടുംബശ്രീ പ്രവര്‍ത്തകരുടെ സഹായത്തോടെ  പദ്ധതിക്കു  അര്‍ഹരായവരുടെ മുന്‍ഗണനാ ലിസ്റ്റ് തയാറാക്കും. ഈമാസം 30നു മുമ്പായി  ഇത്തരത്തില്‍ തയാറാക്കിയ ലിസ്റ്റ് നഗരസഭക്കു നല്‍കാന്‍ നിര്‍ദേശം നല്‍കിയിട്ടുണ്ട്. ഇതു സംബന്ധിച്ചുള്ള ഹിയറിങ് കമ്മറ്റിയോഗം ഇന്നലെ നടന്നു.
നഗരസഭയിലെ അമ്പതു വാര്‍ഡുകളിലേക്കും അന്‍പത് ജീവനക്കാരെ കോഡിനേറ്റര്‍മാരായി നിയമിക്കാന്‍ യോഗത്തില്‍ തീരുമാനമായി. സര്‍വേയിലൂടെ അര്‍ഹരായവരെ കണ്ടത്തികഴിഞ്ഞാല്‍ ഭവന നിര്‍മാണ നടപടികള്‍ക്കു വേഗത കൈവരുമെന്നാണ് അറിയുന്നത്.
  മൂന്നുലക്ഷം രൂപയുടെ  പദ്ധതിയില്‍ ഒന്നരലക്ഷം  കേന്ദ്ര സര്‍ക്കാറും അന്‍പതിനായിരം സംസ്ഥാന ഗവണ്‍മെന്റും ,അമ്പതിനായിരം  നഗരസഭയും , അമ്പതിനായിരം ഗുണഭോക്താവുമാണ്‌ചെലവഴിക്കുക. നഗരസഭയിലെ കുടുംബശ്രീ അംഗങ്ങള്‍, കൗണ്‍സിലര്‍മാര്‍ , നഗരസഭാ ജീവനക്കാര്‍ എന്നിവര്‍ക്കു പദ്ധതിയുമായി ബന്ധപ്പെട്ട പരിശീലനവും നല്‍കും.