ഉത്തര്‍പ്രദേശിലെ കോണ്‍ഗ്രസ് നേതാക്കള്‍ അയോധ്യ സന്ദര്‍ശിക്കും

അയോധ്യ: രാമക്ഷേത്ര പ്രതിഷ്ഠയുമായി ബന്ധപ്പെട്ട ചര്‍ച്ചകള്‍ക്കിടെ ഉത്തര്‍പ്രദേശിലെ കോണ്‍ഗ്രസ് നേതാക്കള്‍ ഇന്ന് അയോധ്യ സന്ദര്‍ശിക്കും. ഉച്ചക്ക് 12ന് ക്ഷേത്ര ദര്‍ശനം നടത്തുന്ന നേതാക്കള്‍ സരയൂനദിയില്‍ സ്‌നാനം നടത്തിയ ശേഷം മറ്റു ക്ഷേത്രങ്ങളും സന്ദര്‍ശിക്കും. മകരസംക്രാന്തി പൂജകളുടെ ഭാഗമായാണ് നേതാക്കളുടെ സന്ദര്‍ശനം.

ഉത്തര്‍പ്രദേശിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി അവിനാശ് പാണ്ഡെ, പി.സി.സി അധ്യക്ഷന്‍ അജയ് റായ്, പ്രമോദ് തിവാരി എം.പി, അനുരാധ മിശ്ര, പി.എല്‍ പുനിയ എന്നിവരാണ് അയോധ്യയിലെത്തുക.

രാമക്ഷേത്ര പ്രതിഷ്ഠാ ചടങ്ങില്‍ പങ്കെടുക്കില്ലെന്ന് കോണ്‍ഗ്രസ് വ്യക്തമാക്കിയതിന് പിന്നാലെയാണ് നേതാക്കള്‍ അയോധ്യയിലെത്തുന്നത്. ക്ഷേത്രം സന്ദര്‍ശിക്കുന്നതിന് പാര്‍ട്ടി എതിരല്ലെന്നും ആര്‍ക്ക് വേണമെങ്കിലും ക്ഷേത്രദര്‍ശനം നടത്താമെന്നുമാണ് കോണ്‍ഗ്രസ് വിശദീകരണം.