രാഹുല്‍ മാങ്കൂട്ടത്തിലിന്റെ അറസ്റ്റ്: യൂത്ത് കോണ്‍ഗ്രസ് മാര്‍ച്ചില്‍ സംഘര്‍ഷം; പ്രതിഷേധം തുടരുന്നു

തിരുവനന്തപുരം/ കോഴിക്കോട്: രാഹുല്‍ മാങ്കൂട്ടത്തിലിന്റെ അറസ്റ്റില്‍ പ്രതിഷേധിച്ച് കോണ്‍ഗ്രസ് പ്രതിഷേധം തുടരുന്നു. സംസ്ഥാനത്തിന്റെ വിവിധ ഭാഗങ്ങളില്‍ നടന്ന പ്രതിഷേധം സംഘര്‍ഷഭരിതമായി.

കോഴിക്കോട് നടന്ന പ്രതിഷേധത്തില്‍ ബാരിക്കേഡ് മറിച്ചിടാന്‍ പ്രവര്‍ത്തകര്‍ ശ്രമിച്ചതിന് പിന്നാലെ, പൊലിസ് ജലപീരങ്കിയും കണ്ണീര്‍ വാതകവും പ്രയോഗിച്ചു. പ്രവര്‍ത്തകര്‍ കണ്ണീര്‍വാതക ഷെല്ലുകള്‍ പൊലീസിനുനേരെ തിരിച്ചെറിഞ്ഞു. തുടര്‍ന്ന് ഒരുവിഭാഗം പ്രവര്‍ത്തകര്‍ കളക്ടറേറ്റിന് മുന്നിലെ കോഴിക്കോട് വയനാട് പാത ഉപരോധിച്ചു.

അടൂര്‍ നഗരസഭാ കാര്യാലയത്തിനുമുന്നില്‍, മറിച്ചിട്ട ബാരിക്കേഡുകള്‍ക്കുമുകളില്‍ നിലയുറപ്പിച്ച പ്രവര്‍ത്തകരും പൊലീസും തമ്മില്‍ ഉന്തുംതള്ളുമുണ്ടായി.

തൃശൂരിലും ബാരിക്കേഡ് മറിച്ചിടാന്‍ ശ്രമിച്ച പ്രവര്‍ത്തകര്‍ക്കു നേരെ ജലപീരങ്കി പ്രയോഗിച്ചു. മലപ്പുറത്ത് ബാരിക്കേഡിന് മുകളില്‍ കയറി പ്രവര്‍ത്തകര്‍ മുദ്രാവാക്യം വിളിച്ചു.

അതേസമയം, സെക്രട്ടറിയേറ്റ് മാര്‍ച്ചുമായി ബന്ധപ്പെട്ട രണ്ടു കേസില്‍ കൂടി രാഹുലിന്റെ അറസ്റ്റ് ഇന്ന് രേഖപ്പെടുത്തിയിരുന്നു. രണ്ടിലും കോടതി ജാമ്യം അനുവദിച്ചു. എന്നാല്‍ ആദ്യമെടുത്ത കേസില്‍ ജാമ്യം ലഭിക്കാത്തതിനാല്‍ ജയിലില്‍ തുടരേണ്ടിവരും.