അബുദാബി: കുട്ടികളുടെയും കുടുംബങ്ങളുടെയും സുരക്ഷയും സ്വകാര്യതയും ലംഘിക്കപ്പെടാതിരിക്കാനായി സമൂഹ മാധ്യമങ്ങളില്‍ അത്തരം ഫോട്ടോകളും വീഡിയോകളും പങ്കുവയ്ക്കുന്നതിനെതിരെ മുന്നറിയിപ്പ് നൽകി യുഎഇ അതോറിറ്റി. ഫോട്ടോകളും വീഡിയോകളും ഷെയര്‍ ചെയ്യുമ്പോഴും മറ്റുള്ളവരുമായി ഇടപഴകുമ്പോഴും കുട്ടികളും മാതാപിതാക്കളും ജാഗ്രത പാലിക്കണമെന്ന് അബുദാബി ജുഡീഷ്യല്‍ ഡിപാര്‍ട്ട്മെന്റ് (എഡിജെഡി) അഭ്യര്‍ത്ഥിച്ചു.

നിരുപദ്രവകരമെന്ന് തോന്നുന്ന ലൈവ് സ്ട്രീം പോലുള്ള കാര്യങ്ങളും മറ്റുള്ളവരുമായുള്ള ഇടപഴകലുകളും അപ്രതീക്ഷിത പ്രത്യാഘാതങ്ങള്‍ക്ക് വഴിവെക്കുമെന്ന് ജുഡീഷ്യല്‍ ഡിപാര്‍ട്ട്മെന്റ് ചൂണ്ടിക്കാട്ടി. കുട്ടികള്‍ മാതാപിതാക്കളുടെ ഫോട്ടോ എടുക്കുന്നതും സുഹൃത്തുക്കളുമായി പങ്കിടുന്നതും ശ്രദ്ധിക്കണം. പ്രായപൂര്‍ത്തിയാകാത്തവരുടെ സുരക്ഷ ഉറപ്പാക്കുന്നതിന് ഫോട്ടോകളും വീഡിയോകളും ഷെയര്‍ ചെയ്യുമ്പോള്‍ രക്ഷിതാക്കളും ജാഗ്രത പാലിക്കണം.

കുടുംബത്തിന്റെ മേല്‍വിലാസവും താമസിക്കുന്ന വീടിന്റെ വിശദാംശങ്ങളും പരസ്യപ്പെടുത്തുന്നത് ദോഷംചെയ്യും. കുടുംബാംഗങ്ങളുടെ ഫോട്ടോകളും സ്വകാര്യ കുടുംബ ഇവന്റുകള്‍ റെക്കോര്‍ഡ് ചെയ്ത് പോസ്റ്റ് ചെയ്യുമ്പോഴും തത്സമയം സ്ട്രീമിങ് നടത്തുമ്പോഴും ശ്രദ്ധിക്കണം.കുടുംബത്തിന്റെ മേല്‍വിലാസവും താമസിക്കുന്ന വീടിന്റെ വിശദാംശങ്ങളും പരസ്യപ്പെടുത്തുന്നത് ദോഷംചെയ്യും. കുടുംബാംഗങ്ങളുടെ ഫോട്ടോകളും സ്വകാര്യ കുടുംബ ഇവന്റുകള്‍ റെക്കോര്‍ഡ് ചെയ്ത് പോസ്റ്റ് ചെയ്യുമ്പോഴും തത്സമയം സ്ട്രീമിങ് നടത്തുമ്പോഴും ശ്രദ്ധിക്കണം.

ഇത്തരം സാഹചര്യങ്ങള്‍ തടയാനായി മാതാപിതാക്കള്‍ക്കും മുതിര്‍ന്നവര്‍ക്കും ചില മുന്‍കരുതല്‍ നിര്‍ദേശങ്ങളും എഡിജെഡി മുന്നോട്ടുവയ്ക്കുന്നു. വീടിന് പുറത്തുള്ളവരുമായി സ്വകാര്യ വിവരങ്ങള്‍ പങ്കുവെക്കുമ്പോള്‍ ഉണ്ടാകുന്ന അപകടങ്ങളെക്കുറിച്ച് രക്ഷിതാക്കള്‍ കുട്ടികളെ ബോധവത്കരിക്കണമെന്നതാണ് ഇതിലൊന്ന്. സ്വകാര്യത സംബന്ധിച്ച കൃത്യമായ അവബോധം കുട്ടികളില്‍ വളര്‍ത്തണം.

രക്ഷിതാക്കള്‍ക്കു പുറമേ വിദ്യാലയങ്ങള്‍ വഴിയും കുട്ടികളെ അവരുടെ ജീവിതത്തിന്റെ വിശദാംശങ്ങള്‍ സ്വകാര്യമായി സൂക്ഷിക്കേണ്ടതിന്റെ പ്രാധാന്യത്തെക്കുറിച്ച് ബോധവത്കരിക്കണം. ഇലക്ട്രോണിക് ബ്ലാക്ക്‌മെയില്‍ രീതികളെക്കുറിച്ചും വീടിന്റെ സ്ഥലങ്ങളും വിശദാംശങ്ങളും വെളിപ്പെടുത്തുന്നതിലെ അപകടസാധ്യതകളെക്കുറിച്ചും കുട്ടികളെ ബോധ്യപ്പെടുത്തണമെന്നും അബുദാബി ജുഡീഷ്യല്‍ ഡിപാര്‍ട്ട്മെന്റ് നിര്‍ദേശിക്കുന്നു.

Content Highlights:UAE authorities have warned against sharing pictures of children and families