തിരൂര്‍: ലഹരി പാനീയം നല്‍കി യുവതിയെ പീഡിപ്പിച്ച കേസില്‍ ഭര്‍ത്താവിന്റെ സുഹൃത്തുക്കള്‍ മൂന്ന് വര്‍ഷത്തിന് ശേഷം അറസ്റ്റില്‍. തിരുന്നാവായ അനന്താവൂര്‍ സ്വദേശിയായ കൈത്തക്കര മച്ചിഞ്ചേരി മുഹമ്മദ് കുട്ടി എന്ന മാനു (49), വലിയ പറപ്പൂര്‍ കൊടിലിങ്ങല്‍ വളപ്പില്‍ അയൂബ് (30) എന്നിവരാണ് അറസ്റ്റിലായത്. 2013 സെപ്തംബര്‍ 22നാണ് യുവതിയുടെ പരാതിയെ തുടര്‍ന്ന് കല്‍പകഞ്ചേരി പൊലിസ് കേസെടുത്ത് അന്വേഷണം തുടങ്ങിയത്.
യുവതിയുടെ ഭര്‍ത്താവ് കൈത്തക്കര കുന്നത്ത് അബ്ദുറസാഖ് ലഹരിപാനീയം നല്‍കി മയക്കിയ ശേഷം സുഹൃത്തുക്കള്‍ക്ക് കൈമാറിയെന്നാണ് കേസ്. 2011 നവംബര്‍ മുതല്‍ 2013 മെയ് വരെ ഭര്‍ത്താവും സുഹൃത്തുക്കളും ചേര്‍ന്ന് യുവതിയെ ലൈംഗികമായി പീഡിപ്പിച്ചെന്നാണ് കേസ്. കേസിനെ തുടര്‍ന്ന് അബ്ദുറസാഖിനെയും സുഹൃത്തിനെയും പൊലിസ് മുമ്പ് അറസ്റ്റ് ചെയ്തിരുന്നു. ഇതിനിടെ വിദേശത്തേക്ക് കടന്ന മുഹമ്മദ് കുട്ടി എന്ന മാനുവും അയൂബും നാട്ടില്‍ തിരിച്ചെത്തിയതോടെ പൊലിസ് അറസ്റ്റ് ചെയ്യുകയായിരുന്നു. ഇവരെ തിരൂര്‍ കോടതി റിമാന്‍ഡ് ചെയ്തു.