ലണ്ടന്‍: യു.കെയില്‍ വകഭേദം വന്ന കൊവിഡിനേക്കാള്‍ ഭീകരമായ ദക്ഷിണാഫ്രിക്കന്‍ വകഭേദം വൈദ്യലോകത്ത് ആശങ്കയുണ്ടാക്കുന്നു. നിലവില്‍ കണ്ടെത്തിയ വാക്‌സിന്‍ ഫലപ്രദമായേക്കില്ലെന്നാണ് യു.കെയിലെ ശാസ്ത്രജ്ഞന്മാര്‍ വിലയിരുത്തുന്നത്.

'ദക്ഷിണാഫ്രിക്കന്‍ വകഭേദത്തില്‍ ഞാന്‍ ആശങ്കയിലാണ്': യു.കെ ആരോഗ്യ സെക്രട്ടറി മാറ്റ് ഹാന്‍കോക്ക് ബി.ബി.സി റേഡിയോയില്‍ പറഞ്ഞു. 'യു.കെയിലേതിനേക്കാള്‍ പ്രഹരശക്തിയുള്ളതാണ് ദക്ഷിണാഫ്രിക്കന്‍ വകഭേദം'- അദ്ദേഹം പറഞ്ഞു.

എന്നാല്‍, നിലവില്‍ കണ്ടെത്തിയ വാക്‌സിന്‍ മതിയാവാതെ വരുമോയെന്ന കാര്യത്തില്‍ തെളിവുകളൊന്നുമില്ല. യു.കെ വകഭേദത്തെ തുരത്താന്‍ നിലവിലെ വാക്‌സിന്‍ മതിയാവുമെന്നാണ് ഈ രംഗത്തുള്ളവരുടെ അനുമാനം. എന്നാല്‍ ഇതും പരീക്ഷണ വിധേയമാക്കിയിട്ടില്ല.

യു.കെ സര്‍ക്കാരിന്റെ കൊവിഡ് ടാസ്‌ക്‌ഫോഴ്‌സ് നേതൃനിരയിലുള്ള ഓക്‌സ്ഫഡ് യൂനിവേഴ്‌സിറ്റി പ്രൊഫസര്‍ ജോണ്‍ ബെല്ലും ഇക്കാര്യത്തില്‍ ആശങ്ക പ്രകടിപ്പിച്ചു. ദക്ഷിണാഫ്രിക്കന്‍ വകഭേദത്തിന് നിലവിലെ വാക്‌സിന്‍ ഫലപ്രദമാണോയെന്നത് 'വലിയൊരു ചോദ്യ'മാണെന്ന് അദ്ദേഹം പ്രതികരിച്ചു.