തിരുവനന്തപുരം: കടയ്ക്കാവൂരില്‍ മകനെ ലൈംഗികമായി ഉപദ്രവിച്ചെന്ന പരാതിയില്‍ വക്കം സ്വദേശിയായ മാതാവ് അറസ്റ്റില്‍. 14 വയസുള്ള മകനെ നിരന്തരം പീഡിപ്പിച്ചെന്ന പരാതിയെ തുടര്‍ന്നാണ് 38 വയസുള്ള യുവതിയെ കടയ്ക്കാവൂര്‍ പൊലിസ് അറസ്റ്റ് ചെയ്തത്.
കുട്ടിയുടെ അച്ഛന്‍ ചൈല്‍ഡ് ലൈനില്‍ പരാതി നല്‍കിയതിനെ തുടര്‍ന്നായിരുന്നു നടപടി. നാലു ദിവസം മുന്‍പ് അറസ്റ്റിലായ യുവതി ഇപ്പോള്‍ റിമാന്‍ഡിലാണ്. ഭര്‍ത്താവുമായി വേര്‍പിരിഞ്ഞു കഴിയുന്ന യുവതിയുടെ സംരക്ഷണയിലായിരുന്നു വര്‍ഷങ്ങളായി മകന്റെ താമസം.
ഇവിടെനിന്നു മകനെയും കൊണ്ട് പിതാവ് 2019 ഡിസംബര്‍ 10ന് വിദേശത്തേക്കു പോയിരുന്നു. അവിടെ വച്ച് മകന്റെ സ്വഭാവത്തില്‍ സംശയം തോന്നിയതിനെ തുടര്‍ന്ന് നാട്ടിലെത്തിയ ശേഷം ചൈല്‍ഡ് വെല്‍ഫയര്‍ കമ്മിറ്റിയെ വിവരം അറിയിച്ചു. തുടര്‍ന്ന് കുട്ടിയെ കൗണ്‍സിലിങ് നടത്തിയപ്പോഴാണ് കഴിഞ്ഞ നാലു വര്‍ഷത്തോളമായി കുട്ടിയെ അമ്മ ലൈംഗികമായി പീഡിക്കുന്നുവെന്ന് വ്യക്തമായതായി ചൈല്‍ഡ് വെല്‍ഫയര്‍ കമ്മിറ്റി പൊലിസിന് നല്‍കിയ പരാതിയില്‍ പറയുന്നു.
കുട്ടിയുടെ രഹസ്യമൊഴി കൂടി രേഖപ്പെടുത്തിയ ശേഷമാണ് പൊലിസ് അമ്മയെ അറസ്റ്റ് ചെയ്തത്. അതേസമയം കുടുംബ പ്രശ്‌നത്തിന്റെ ഭാഗമായി പരാതി കെട്ടിചമച്ചതാണോയെന്ന് പരിശോധിച്ചിരുന്നതായി പൊലിസ് പറഞ്ഞു.
എന്നാല്‍ മജിസ്‌ട്രേറ്റിന് മുന്നിലും കുട്ടി മൊഴിയില്‍ ഉറച്ചു നിന്നതോടെയാണ് മാതാവിനെ അറസ്റ്റ് ചെയ്തതെന്ന് ആറ്റില്‍ ഡിവൈ.എസ്.പി എസ്.വൈ സുരേഷ് പറഞ്ഞു.