ആഗ്ര: താജ്മഹലിനു മുന്‍പില്‍ കാവിക്കൊടി വീശുകയും ഉച്ചത്തില്‍ ജയ് ശ്രീറാം മുദ്രാവാക്യം വിളിക്കുകയും ചെയ്ത നാല് ഹിന്ദുത്വ സംഘടനാ പ്രവര്‍ത്തകര്‍ അറസ്റ്റില്‍. ഹിന്ദു യുവ വാഹിണി ജില്ലാ പ്രസിഡന്റ് ഗൗരവ് താക്കൂര്‍, സോനു ഭാഗീല്‍, വിശേഷ് കുമാര്‍, ഋഷി ലാവണ്യ എന്നിവരാണ് പിടിയിലായത്.
മതവികാരം വ്രണപ്പെടുത്താന്‍ ശ്രമിച്ചതുമായി ബന്ധപ്പെട്ട ഐ.പി.സിയിലെ 153 (എ) വകുപ്പ് പ്രകാരം ഇവര്‍ക്കെതിരേ ഉത്തര്‍പ്രദേശ് പൊലിസ് കേസെടുക്കുകയും ചെയ്തു. മുഖ്യമന്ത്രി യോഗി ആദിത്യനാഥ് 2002ല്‍ രൂപീകരിച്ച തീവ്ര ഹിന്ദുത്വ സംഘടനയാണ് ഹിന്ദു യുവവാഹിണി. താജ്മഹല്‍ പരിസരത്തു മതപരമായതോ മറ്റു പ്രചാരണ പരിപാടികള്‍ക്കോ അനുമതിയില്ലാത്തതിനാല്‍ കാവിക്കൊടി വീശിയ സംഭവം സുരക്ഷാ ചട്ടത്തിന്റെ ലംഘനമായാണ് കണക്കാക്കുന്നത്. തിങ്കളാഴ്ചയാണ് കാവിക്കൊടി വീശുന്ന വിഡിയോ ചിത്രീകരിച്ചത്. വിഡിയോ വിവാദമാകുകയും മാധ്യമങ്ങളില്‍ ഉള്‍പ്പെടെ വരികയും ചെയ്തതോടെയാണ് യു.പി പൊലിസ് ഇവര്‍ക്കെതിരേ കേസെടുത്തത്. കൊവിഡ് സാഹചര്യത്തില്‍ താജ്മഹലിലേക്കെത്തുന്ന സന്ദര്‍ശകരെ ദേഹപരിശോധന നടത്താറില്ല. അതിനാലാണ് ഇവര്‍ക്കു കാവിക്കൊടിയുമായി വളപ്പില്‍ പ്രവേശിക്കാന്‍ കഴിഞ്ഞത്.
വിഡിയോ നിരീക്ഷിച്ച ശേഷം മറ്റു നടപടികളിലേക്കു കടക്കുമെന്ന് താജ്ഗഞ്ച് പൊലിസ് ഇന്‍സ്‌പെക്ടര്‍ ഉമേഷ് ചന്ദ്ര ത്രിപാതി പറഞ്ഞു. കഴിഞ്ഞ വര്‍ഷം ഒക്ടോബറിലും താജ്മഹലിനുള്ളില്‍ പ്രവേശിച്ച് ഹിന്ദുത്വ പ്രവര്‍ത്തകര്‍ കാവിക്കൊടി ഉയര്‍ത്തിയിരുന്നു. താജ്മഹല്‍ ശിവക്ഷേത്രമാണെന്ന അവകാശവാദവും ഇവര്‍ നേരത്തെ ഉന്നയിച്ചിരുന്നു.