പനാജി: ഐ.എസ്.എല്‍ സീസണില്‍ ആദ്യമായി കേരളത്തിന്റെ സ്വന്തം മഞ്ഞപ്പട ഒന്നാമത്. ഹൈദരാബാദ് എഫ്.സിയെ ഒരു ഗോളിന് കീഴടക്കിയാണ് കൊമ്പന്‍മാര്‍ ടേബിളില്‍ ആദ്യസ്ഥാനത്തെത്തിയത്. നിലവില്‍ 10 കളികളില്‍ നിന്ന് ബ്ലാസ്റ്റേഴ്‌സിന് 17 പോയിന്റാണുള്ളത്. ആദ്യപകുതിയിലെ 42ാം മിനുട്ടില്‍ അല്‍വാരോ വാസ്‌കെസ് നേടിയ ഗോളാണ് സീസണില്‍ മറ്റൊരു ജയവും ഒപ്പം ടേബിളില്‍ ആദ്യ സ്ഥാനവും ബ്ലാസ്റ്റേഴ്‌സിന്റെ പേരില്‍ എഴുതിച്ചേര്‍ത്തത്. ബ്ലാസ്റ്റേഴ്‌സിന് അനുകൂലമായി ലഭിച്ച ത്രോ ഇന്‍ ഹാഫ് വോളിയിലൂടെ ഹൈദരാബാദിന്റെ പോസ്റ്റിലേക്ക് അടിച്ചുകയറ്റിയാണ് വാസ്‌കെസ് കൊമ്പന്‍മാര്‍ക്ക് ജയം സമ്മാനിച്ചത്. ഒന്നാംപകുതിയില്‍ കാര്യമായ ആക്രമണ പ്രത്യാക്രമണങ്ങളില്ലാതെയായിരുന്നു മത്സരത്തിന്റെ ഒഴുക്ക്. എന്നാല്‍ രണ്ടാംപകുതിയില്‍ സമനില പിടിക്കാനുള്ള ഹൈദരാബാദിന്റെ ശ്രമങ്ങള്‍ മത്സരത്തില്‍ പലപ്പോഴും നെഞ്ചിടിപ്പേറ്റി. ഏത് പ്രതിസന്ധി ഘട്ടത്തിലും ഉലയാതെ അടിയുറച്ചു നിന്ന ബ്ലാസ്റ്റേഴ്‌സ് പ്രതിരോധ നിരയ്ക്ക് തന്നെയാണ് മത്സരത്തില്‍ നൂറില്‍ നൂറു മാര്‍ക്കും.