നെയ്പിതോ
മ്യാന്മറിലെ പുറത്താക്കപ്പെട്ട ജനാധിപത്യ നേതാവ് ഓങ് സാൻ സൂചിക്ക് നാലു വർഷം കൂടി തടവുശിക്ഷ വിധിച്ച് പട്ടാള കോടതി. അനധികൃതമായി വാക്കി ടോക്കി വാങ്ങി കൈവശംവച്ച കേസിലാണ് ശിക്ഷ. ഡിസംബറിൽ കൊവിഡ് നിയമം ലംഘിച്ച കേസിൽ നാലുവർഷത്തെ തടവിനു വിധിച്ച ശേഷം കോടതി ശിക്ഷ രണ്ടുവർഷമാക്കി ഇളവു ചെയ്തിരുന്നു. ഇതോടെ ആകെ ആറുവർഷത്തെ തടവുശിക്ഷ ഇതിനകം സൂചിക്കെതിരേ വിധിച്ചുകഴിഞ്ഞു.
കഴിഞ്ഞ ഫെബ്രുവരി ഒന്നിന് പട്ടാളം അട്ടിമറിയിലൂടെ അധികാരം പിടിച്ചെടുത്തതു മുതൽ സൂചി തടവിലാണ്. പത്തിലേറെ കേസുകളാണ് സമാധാന നൊബേൽ ജേതാവായ സൂചിക്കെതിരേ ചുമത്തിയിട്ടുള്ളത്. ഇവയിലെല്ലാം ശിക്ഷിക്കപ്പെട്ടാൽ സൂചിക്ക് ജീവിതകാലത്ത് പുറത്തിറങ്ങാനാകില്ല. എന്നാൽ തനിക്കുമേൽ ചുമത്തിയ കുറ്റങ്ങൾ സൂചി നിഷേധിച്ചിരുന്നു.

മാധ്യമങ്ങളെ പുറത്താക്കിയായിരുന്നു കോടതി കേസിൽ ശിക്ഷ വിധിച്ചത്. സൂചിയുടെ അഭിഭാഷകരെയും മാധ്യമങ്ങളുമായി സംസാരിക്കുന്നതിൽനിന്ന് വിലക്കിയിരുന്നു.
സൂചിക്കെതിരായ കോടതിവിധിയെ യു.എൻ മനുഷ്യാവകാശ സംഘടന മേധാവി മിഷേല ബഷ്ലറ്റ് അപലപിച്ചു. കോടതി നടപടികൾ സുതാര്യമല്ലെന്നും സൂചി ആയുഷ്കാലം ജയിലിൽ കഴിയേണ്ടിവരുമെന്നും അവർ പറഞ്ഞു.
2020ലെ പൊതുതെരഞ്ഞെടുപ്പിൽ സൂചിയുടെ നാഷനൽ ലീഗ് ഫോർ ഡമോക്രസി (എൻ.എൽ.ഡി) പാർട്ടി വൻ വിജയം നേടിയതോടെയാണ് സൈന്യം അധികാരം പിടിച്ചത്. തിരഞ്ഞെടുപ്പിൽ കൃത്രിമം നടന്നതായി ആരോപിച്ചായിരുന്നു ഇത്. തുടർന്ന് പട്ടാള അട്ടിമറിക്കെതിരേ പ്രതിഷേധിച്ചവർക്ക് നേരെ സുരക്ഷാ സേന നടത്തിയ വെടിവയ്പിൽ 1,303 പേർ കൊല്ലപ്പെട്ടിരുന്നു. 10,600 പേരെ പട്ടാളം തടവിലിടുകയും ചെയ്തു.