തിരുവനന്തപുരം: അച്ചടക്കരാഹിത്യവും അക്കാദമിക് നിലവാരത്തകര്‍ച്ചയും വച്ചുപൊറുപ്പിക്കാനാവില്ലെന്നും കേരള യൂണിവേഴ്‌സിറ്റി വൈസ് ചാന്‍സലറുടെ നടപടിയില്‍ ഖേദവും വേദനയുമുണ്ടെന്നും ഗവര്‍ണര്‍ ആരിഫ് മുഹമ്മദ് ഖാന്‍. സര്‍വകലാശാലകളുടെ ചാന്‍സലറായി തുടരുന്ന കാര്യം ആലോചിക്കാന്‍ കുറച്ച് സമയം വേണമെന്നും അദ്ദേഹം പറഞ്ഞു.

ഉന്നതവിദ്യാഭ്യാസ മന്ത്രി ആര്‍. ബിന്ദുവിന്റെ നിലപാട് സ്വാഗതാര്‍ഹമാണ്. സര്‍വകലാശാലകളില്‍ ഒരു തരത്തിലുള്ള ഇടപെടലുകളും സമ്മതിക്കില്ല. കേരള യൂണിവേഴ്‌സിറ്റി വൈസ് ചാന്‍സലറുടെ നടപടിയില്‍ ഖേദവും വേദനയുമുണ്ട്. ഗവര്‍ണര്‍ പറഞ്ഞു. ഇടുക്കിയിലെ കാംപസ് കൊലപാതകം ഒരു കാരണവശാലും അംഗീകരിക്കാനാവില്ല. വിദ്യാസമ്പന്നമായ സമൂഹത്തിന് യോജിച്ചതല്ല ഇത്തരം കൊലപാതകം. സര്‍വകലാശാലകള്‍ ഭാവി തലമുറയെ വാര്‍ത്തെടുക്കാനാണെന്നും ഗവര്‍ണര്‍ പറഞ്ഞു.