ദോഹ: ഈജിപ്തില്‍നിന്ന് ഖത്തറിലേക്കുള്ള വിമാന സര്‍വിസുകള്‍ക്ക് 18ന് തുടക്കമാകും. ഈജിപ്ത് എയറിന്റെ ഖത്തറിലേക്കുള്ള വിമാന സര്‍വിസുകള്‍ 18 മുതല്‍ തുടങ്ങാനാണ് പദ്ധതിയെന്ന് ഈജിപ്ത് ഏവിയേഷന്‍ മന്ത്രാലയം പ്രസ്താവനയില്‍ വ്യക്തമാക്കി.

ഈജിപ്ത് എയര്‍ ഖത്തറിലേക്ക് പ്രതിദിന സര്‍വിസുകള്‍ നടത്തും. കെയ്‌റോയില്‍നിന്ന് ദിവസേനയും അലക്‌സാണ്ട്രിയയില്‍നിന്ന് ആഴ്ചയില്‍ നാലു തവണയും സര്‍വിസ് ഉണ്ടാകും. ഇരു രാജ്യങ്ങള്‍ക്കിടയിലുമുള്ള ചരക്കു ഗതാഗതവും ഉടന്‍ തുടങ്ങും.

ഖത്തര്‍ എയര്‍വേയ്‌സും അധികം താമസിയാതെ ദോഹ-ഈജിപ്ത് സര്‍വിസ് തുടങ്ങുമെന്നാണ് വിവരം. ഇക്കഴിഞ്ഞ ചൊവ്വാഴ്ചയാണ് ഖത്തറിനു മേലുള്ള വ്യോമവിലക്ക് ഈജിപ്ത് നീക്കിയത്. സൗദി അറേബ്യയില്‍ നടന്ന ഗള്‍ഫ് സഹകരണ കൗണ്‍സില്‍ ഉച്ചകോടിയില്‍ ഒപ്പുവച്ച അല്‍ ഉല കരാറിന്റെ അടിസ്ഥാനത്തിലാണ് രാജ്യങ്ങള്‍ തമ്മിലുള്ള വ്യോമഗതാഗതം പുന:സ്ഥാപിച്ചത്.