തിരുവനന്തപുരം: കെ.എസ്.ആര്‍.ടി.സി വിവാദത്തില്‍ ഇടപെട്ട് മുഖ്യമന്ത്രി പിണറായി വിജയന്‍. എം.ഡി ബിജു പ്രഭാകറിനെ മുഖ്യമന്ത്രി ഓഫിസിലേക്ക് വിളിപ്പിച്ചു. വിവാദ പ്രസ്താവനകള്‍ മുഖ്യമന്ത്രി വിലക്കി. നിയന്ത്രണം പാലിക്കണമെന്ന് മുഖ്യമന്ത്രി ബിജു പ്രഭാകറിനോട് നിര്‍ദ്ദേശിച്ചു.

അതേസമയം, കെ.എസ്.ആര്‍.ടി.സിയില്‍ പരിഷ്‌കരണ നടപടികള്‍ തുടരാന്‍ പിന്തുണയുണ്ടാകുമെന്ന് മുഖ്യമന്ത്രി ബിജുപ്രഭാകറിനെ അറിയിച്ചിട്ടുണ്ടെന്നാണ് വിവരം. ഇന്നലെ ക്ലിഫ്ഹൗസില്‍ വെച്ചാണ് കെ.എസ്.ആര്‍.ടി.സി എം.ഡി മുഖ്യമന്ത്രിയെ കണ്ടത്.

പരസ്യപ്രസ്താവനയ്‌ക്കെതിരെ സി.ഐ.ടി.യു ഉള്‍പ്പെടെ യൂണിയനുകള്‍ രംഗത്തുവന്നതോടെ കെ.എസ്.ആര്‍.ടി.സിയില്‍ പുതിയ പോര്‍മുഖം തുറന്നിരുന്നു.

കെ.എസ്.ആര്‍.ടിസിയില്‍ കൊണ്ടുവരുന്ന പരിഷ്‌കരണ നടപടികള്‍ക്ക് ഒരുവിഭാഗം തൊഴിലാളികള്‍ തുരങ്കം വെക്കുന്നുവെന്നും തട്ടിപ്പും വെട്ടിപ്പും നടത്തുന്നുവെന്നുമാണ് ബിജു പ്രഭാകര്‍ ആരോപിച്ചത്.