തൃപ്രയാര്‍: പതിനഞ്ചാമത് സംസ്ഥാന സബ് ജൂനിയര്‍ ബെയ്‌സ് ബോള്‍ ചാമ്പ്യന്‍ഷിപ്പ് ഇന്നു മുതല്‍ 22 വരെ നാട്ടിക ഗവണ്‍മന്റ് ഹൈസ്‌കൂള്‍ ഗ്രൗണ്ടില്‍ നടക്കുമെന്ന് ഭാരവാഹികള്‍ അറിയിച്ചു. ജില്ലാ ബെയ്‌സ് ബോള്‍ അസോസിയേഷന്റെയും നാട്ടിക ഗവണ്‍മെന്റ് ഫിഷറീസ് സ്‌കൂളിന്റെയും സംയുക്താഭിമുഖ്യത്തിലാണ് ചാമ്പ്യന്‍ഷിപ്പ് സംഘടിപ്പിക്കുന്നത്. ഇന്ന്  ഉച്ചതിരിഞ്ഞ് മൂന്നിന് നടക്കുന്ന ചടങ്ങില്‍ പ്രൊഫ.കെ.യു അരുണന്‍ എം.എല്‍.എ ചാമ്പ്യന്‍ഷിപ്പ് ഉദ്ഘാടനം ചെയ്യും.
നാട്ടിക ഗ്രാമപഞ്ചായത്ത് പ്രസിഡന്റ് പി.വിനു ചടങ്ങില്‍ മുഖ്യാതിഥിയാകും. സംസ്ഥാനത്തെ പതിനാലു ജില്ലകളില്‍ നിന്ന് അഞ്ഞൂറോളം കായികതാരങ്ങളാണ് ചാമ്പ്യന്‍ഷിപ്പില്‍ പങ്കെടുക്കുക.
ദേശീയ ചാമ്പ്യന്‍ഷിപ്പിനുള്ള കേരള ടീമിനെ നാട്ടികയില്‍ നടക്കുന്ന സംസ്ഥാന ചാമ്പ്യന്‍ഷിപ്പില്‍ നിന്നാണ് തെരഞ്ഞെടുക്കുക. ജില്ലാ ബെയ്‌സ് ബോള്‍ അസോസിയേഷന്‍ ചെയര്‍മാന്‍ സി.എം നൗഷാദ്, കെ.ബി ഹംസ, സ്‌പോര്‍ട്‌സ് കൗണ്‍സില്‍ ജില്ലാ കമ്മറ്റി അംഗം അഖില്‍ അനിരുദ്ധന്‍, ടി.സി വിഷ്ണു എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.