തിരുവനന്തപുരം: ചികിത്സയ്ക്ക് ശേഷം ആശുപത്രിവിട്ട വാവ സുരേഷിന്റെ വീട് സന്ദര്‍ശിച്ച് മന്ത്രി വാസവന്‍. തനിക്കെതിരെ വനം വകുപ്പ് ഉദ്യോഗസ്ഥന്റെ നേതൃത്വത്തില്‍ കാംപയിന്‍ നടന്നു എന്ന വാവ സുരേഷിന്റെ പ്രസ്താവനയെ മന്ത്രി അനുകൂലിച്ചു.

ഉദ്യോഗസ്ഥര്‍ക്ക് വാവ സുരേഷിനോട് കുശുമ്പാണ്. വാവയെ വിളിക്കരുതെന്ന് പറയാന്‍ വനം വകുപ്പ് ഉദ്യോഗസ്ഥര്‍ക്ക് കഴിയില്ലെന്നും അദ്ദേഹം കൂട്ടിചേര്‍ത്തു. ഉദ്യോഗസ്ഥരെ വിളിച്ചാല്‍ അവര്‍ സമയത്ത് വരാറുണ്ടോ എന്ന് മന്ത്രി ചോദിച്ചു. നന്മ ചെയ്യുന്നത് ആരും തെറ്റായി വ്യാഖ്യാനിക്കരുതെന്നും വാസവന്‍ കൂട്ടിച്ചേര്‍ത്തു.

വാവ സുരേഷിന്റെ വീട് സന്ദര്‍ശിച്ച ശേഷം മാധ്യമങ്ങളെ കാണുകയായിരുന്നു മന്ത്രി. കുടുംബത്തിന്റെ ആഗ്രഹം അനുസരിച്ച് വീട് പണിത് നല്‍കുമെന്നും മന്ത്രി വ്യക്തമാക്കി.