ജിദ്ദ: സഊദിയിൽ കൊവിഡ് രൂക്ഷമായ സാഹചര്യത്തിൽ ജോലി സ്ഥലങ്ങളിൽ ജീവനക്കാർ പരസ്പരം ഹസ്തദാനം ചെയ്യുന്നത് ഒഴിവാക്കണമെന്ന് മാനവശേഷി, സാമൂഹിക വികസന മന്ത്രാലയം. എല്ലാവരും മുൻകരുതൽ, പ്രതിരോധ നടപടികൾ അനിവാര്യമായും പാലിക്കുകയും സാമൂഹിക അകലം ഉറപ്പുവരുത്തുകയും വേണം. ആൾക്കൂട്ടങ്ങളും ഒത്തുചേരലുകളും തടയുന്നതിന് ആവശ്യമായ നടപടികൾ സ്വീകരിക്കണം.

മാസ്‌കുകൾ ധരിക്കാൻ പ്രത്യേക ശ്രദ്ധ കാണിക്കുകയും ഹസ്തദാനങ്ങൾ ഒഴിവാക്കുകയും വേണം. സാധ്യമായത്ര വീഡിയോ കോൾ സംവിധാനങ്ങൾ ഉപയോഗിച്ച് മീറ്റിംഗുകൾ ഡിജിറ്റലാക്കണം. വീടുകളിൽ ഇരുന്നുള്ള ജോലി കഴിയുന്നത്ര പ്രാവർത്തികമാക്കുകയും മെച്ചപ്പെട്ട തൊഴിൽ സമയ നയം നടപ്പാക്കുകയും വേണം. സേവനങ്ങൾക്ക് ഇലക്‌ട്രോണിക് ചാനലുകൾ ഉപയോഗപ്പെടുത്താൻ പ്രത്യേകം ശ്രദ്ധ കാണിക്കണമെന്നും ജോലി സ്ഥലങ്ങളിൽ അണുനശീകരണികൾ ലഭ്യമാക്കണമെന്നും മാനവശേഷി, സാമൂഹിക വികസന മന്ത്രാലയം ആവശ്യപ്പെട്ടു.

അതേ സമയം കൊവിഡ് പശ്ചാത്തലത്തിൽ ആരോഗ്യ സുരക്ഷാ മാനദണ്ഡങ്ങൾ നടപ്പിലാക്കുന്നതിന്റെ ഭാഗമായി രാജ്യമെങ്ങും ഡപരിശോധനകൾ കർശനമാക്കുന്നു. കൊവിഡ് വ്യാപനം ഒരു പരിധി വരെ നിയന്ത്രണ വിധേയമായതിന് ശേഷം വീണ്ടും രോഗബാധിതരുടെ എണ്ണം ക്രമാനുഗതമായി വർധിച്ച പശ്ചാത്തലത്തിലാണ് നടപടി. യാമ്പു, ജിസാൻ, വടക്കൻ അതിർത്തി, മക്ക പ്രവിശ്യകളിലായി നിരവധി സ്ഥാപനങ്ങൾക്കെതിരെ അധികൃതർ നടപടി സ്വീകരിച്ചു. കൊവിഡ് നിയമ ലംഘനം സ്ഥിരീകരിച്ചതിനെ തുടർന്ന് ഏഴ് സ്ഥാപനങ്ങളാണ് യാമ്പു ബലദിയ്യ അടപ്പിച്ചത്.