കൊല്ലം: പിണറായി വിജയന്‍ മിടുക്കനായ മുഖ്യമന്ത്രിയാണെന്ന് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. കൊല്ലം ശാരദാമഠത്തില്‍ മൂന്നുദിവസത്തെ 'ശ്രീനാരായണ ധര്‍മോല്‍സവ'ത്തിനെത്തിയ അദ്ദേഹം മാധ്യമപ്രവര്‍ത്തകരോടു സംസാരിക്കുകയായിരുന്നു. മുഖ്യമന്ത്രി പിണറായിയോട് ബഹുമാനം മാത്രമേ ഉള്ളൂ. കഴിഞ്ഞ സര്‍ക്കാറാണ് മൈക്രോഫിനാന്‍സ് വിഷയത്തില്‍ കേസെടുത്തത്.
മദ്യനയം സംബന്ധിച്ചു പ്രതിപക്ഷനേതാവ് രമേശ് ചെന്നിത്തലയുടെ അഭിപ്രായം അദ്ദേഹത്തിന്റെ മനസില്‍ തട്ടിയുള്ളതാണ്. യു.ഡി.എഫിന്റെ മദ്യനയം മൂലം കുറച്ചുപേരുടെ തൊഴില്‍ കളയുകയാണുണ്ടായത്. മുഖ്യമന്ത്രിയെ ഇനിയും എസ്.എന്‍.ഡി.പിയുടെ പരിപാടികളിലേക്കു ക്ഷണിക്കുമെന്നും വെള്ളാപ്പള്ളി പറഞ്ഞു. ബി.ഡി.ജെ.എസില്‍ കാലോചിതമായ മാറ്റം വരുത്തുമെന്നും എന്നാല്‍ സംഘടനയെ എസ്.എന്‍.ഡി.പിയുമായി കൂട്ടിയോജിപ്പിക്കില്ലെന്നും അദ്ദേഹം പറഞ്ഞു.