ബംഗളൂരു
ഹിജാബ് വിലക്കി ഉത്തരവിറക്കി പുലിവാല് പിടിച്ച കർണാടക സർക്കാർ പ്രശ്‌നപരിഹാരത്തിന് ശ്രമം നടത്തുന്നു. കേസിലെ വാദം കേൾക്കൽ ഹൈക്കോടതിയിൽ നീണ്ടു പോകുന്ന സാഹചര്യവും കോടതിയിൽ നിന്ന് തിരിച്ചടിയുണ്ടായേക്കാമെന്ന ആശങ്കയും സംസ്ഥാന സർക്കാരിനുണ്ട്. ഹിജാബ് വിലക്ക് എന്തുവിലകൊടുത്തും നടപ്പാക്കുമെന്ന് പറഞ്ഞ വിദ്യാഭ്യാസ മന്ത്രി ഇന്നലെ നിലപാടിൽ അയവു വരുത്തി. ഏതാനും വിദ്യാഭ്യാസ സ്ഥാപനങ്ങളിൽ മാത്രമാണ് ഹിജാബ് വിലക്കുള്ളതെന്നും പ്രശ്‌നം പരിഹരിക്കുമെന്നും അദ്ദേഹം പറഞ്ഞു. ഇതിനു പിന്നാലെ കർണാടക നിയമസഭയിലെ മുസ്്‌ലിം അംഗങ്ങളുടെ യോഗവും അദ്ദേഹം വിളിച്ചു.

ഹിജാബ് ഉൾപ്പെടെയുള്ള മത വസ്ത്രങ്ങൾ ധരിച്ച് ക്ലാസിൽ എത്തേണ്ടതില്ലെന്ന കർണാടക ഹൈക്കോടതിയുടെ ഇടക്കാല ഉത്തരവാണ് കോളജുകളിലും സ്‌കൂളിലും നടപ്പാക്കിയത്. ഇതോടെ പ്രതിഷേധം കനത്തു. അധ്യാപകർ പരസ്യമായി ഹിജാബ് അഴിപ്പിച്ചു. ഇന്നലെയും ഹിജാബ് അനുവദിക്കാത്തതിനെ തുടർന്ന് നൂറു കണക്കിന് വിദ്യാർഥികൾ പരീക്ഷ എഴുതാതെ വീട്ടിലേക്ക് മടങ്ങി. മുസ് ലിം വിദ്യാർഥികൾ ക്ലാസിലെത്താൻ സമ്മർദം ചെലുത്തണമെന്നാണ് എം.എൽ.എമാരുടെ യോഗത്തിൽ മന്ത്രി ആവശ്യപ്പെട്ടത്. എല്ലാ കോളജുകളിലും ഹിജാബ് വിലക്ക് പാലിക്കേണ്ടെന്ന് കർണാടക മുഖ്യമന്ത്രിയും പറഞ്ഞു. ഹൈക്കോടതിയിൽ സർക്കാരിന്റെ വാദം അറിയിക്കാൻ കൂടുതൽ സമയം എ.ജി ചോദിച്ചിട്ടുണ്ട്. വിലക്കിൽ പിടിവാശിയില്ലെന്നും കോടതിയുടെ തീരുമാനം അംഗീകരിക്കുമെന്നുമുള്ള നിലപാട് സർക്കാർ കോടതിയിൽ സ്വീകരിച്ചേക്കുമെന്നാണ് സൂചന. നിലവിലുള്ള യൂനിഫോം നയത്തിനെതിരേ വലിയ വിവാദം ഉണ്ടെന്നും അത് പരിഷ്‌കരിക്കുമെന്നും വിദ്യാഭ്യാസ മന്ത്രി ബി.സി നാഗേഷ് പറഞ്ഞു. ഹൈക്കോടതി ഉത്തരവിനായി സർക്കാർ കാത്തിരിക്കുകയാണെന്നും എം.എൽ.എമാരുടെ യോഗത്തിൽ അദ്ദേഹം പറഞ്ഞു. ഹിജാബ് വിലക്കുമായി ബന്ധപ്പെട്ട് ഫെബ്രുവരി ഒൻപത് മുതൽ വിദ്യാർഥികൾക്ക് ക്ലാസിൽ പങ്കെടുക്കാനാകാത്ത സാഹചര്യവും അന്താരാഷ്ട്ര തലത്തിൽ നേരിടുന്ന വിമർശനവും തിരിച്ചടിയാകുമെന്ന വിലയിരുത്തലാണ് കർണാടക സർക്കാരിനുള്ളത്.