റിയാദ്: ഇന്ത്യൻ സർക്കാർ പുറത്തിറക്കിയ പുതിയ മാർഗ്ഗ നിർദേശങ്ങളുടെ ഭാഗമായി ഏർപ്പെടുത്തിയ മാനദണ്ഡങ്ങൾ നാളെ അർദ്ധ രാത്രി മുതൽ പ്രാബല്യത്തിൽ വരും. ഇതോടെ സഊദി ഉൾപ്പെടെയുള്ള ഗൾഫ് രാജ്യങ്ങളിൽ നിന്നും നാട്ടിലേക്ക് പോകുന്ന പ്രവാസികൾക്ക് യാത്രാ ചിലവ് വർധിക്കും. നിലവിലെ അവസ്ഥയിൽ ദുരിതത്തിൽ കഴിയുന്ന പ്രവാസികൾക്ക് സർക്കാർ തീരുമാനം കൂടുതൽ തിരിച്ചടിയാണ്. പ്രവാസികൾക്ക് വേണ്ടി ശബ്ദമുയർത്താൻ പോലും ആരും ഇല്ലെന്ന സ്ഥിതിയാണിപ്പോൾ. ഇന്ത്യയിലേക്കുള്ള യാത്രക്കായി ആരോഗ്യ, കുടുംബക്ഷേമ മന്ത്രാലയം എന്നിവയിൽ നിന്ന് ലഭിച്ച മാർഗ്ഗനിർദ്ദേശങ്ങൾ അനുസരിച്ചാണ് പുതിയ നിർദേശങ്ങൾ നൽകിയത്.

    സഊദി പ്രവാസികൾക്കാണ് കൂടുതൽ ദുരിതവും പണചിലവും ഉണ്ടാകുക. നിലവിൽ സഊദിയിലേക്ക് നേരിട്ട് വിമാന സർവ്വീസ് ആരംഭിക്കാനുള്ള ശ്രമം പോലും നടത്താത്ത കേന്ദ്ര സർക്കാർ തിരിച്ചിറങ്ങുന്ന പ്രവാസികൾക്ക് കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്. യാത്രയുടെ 72 മണിക്കൂർ ഉള്ളിൽ എടുത്ത പി സി ആർ ടെസ്റ്റ് വേണമെന്നതാണ് ഇതിൽ പ്രധാനം. മാത്രമല്ല, നാട്ടിൽ ഇറങ്ങിയ ശേഷം സ്വന്തം ചിലവിൽ മോളിക്യുലാർ ടെസ്റ്റ് നടത്തണമെന്നും നിർദേശമുണ്ട്. സഊദിയിൽ നിലവിൽ 200-300 റിയാൽ ആണ് പി സി ആർ ടെസ്റ്റിന് നൽകേണ്ടത്. അഥവാ ആറായിരം രൂപ ഇതിന് വേണ്ടി കണ്ടെത്തണം. പലപ്പോഴായി മാത്രമുണ്ടാകുന്ന വിമാന സർവ്വീസിന് ഈടാക്കുന്ന ഉയർന്ന നിരക്ക് തിരിച്ചടിയായി തുടരുന്നതിനിടെയാണ് വീണ്ടും കൂനിന്മേൽ കുരു എന്ന തോതിൽ സർക്കാരിന്റെ നിർദേശങ്ങൾ.

    എല്ലാ യാത്രക്കാരും ഷെഡ്യൂൾ ചെയ്ത യാത്രക്ക് മുമ്പായി ഓൺലൈൻ എയർ സുവിധ പോർട്ടലിൽ ഇ-സെൽഫ് ഡിക്ലറേഷൻ ഫോം സമർപ്പിക്കണം. https://www.newdelhiairport.in/airsuvidha/apho-registration എന്ന ലിങ്കിലാണ് ഇത് സമർപ്പിക്കേണ്ടത്. പോർട്ടലിൽ നെഗറ്റീവ് കൊവിഡ് പി സി ആർ ടെസ്റ്റ് റിപ്പോർട്ട് അപ്‌ലോഡ് ചെയ്യണം, കൂടാതെ ചെക്ക്-ഇൻ സമയത്ത് അത് ഹാജരാക്കുകയും വേണം. യാത്ര ആരംഭിക്കുന്നതിന് മുമ്പ് 72 മണിക്കൂറിനുള്ളിൽ എടുത്ത പരിശോധന റിപ്പോർട്ട് ആണ് സമർപ്പിക്കേണ്ടത്. സ്വയം പ്രഖ്യാപന ഇ-ഫോം സമർപ്പിച്ച് എയർ സുവിധ പോർട്ടലിൽ ആർടി-പിസിആർ നെഗറ്റീവ് സർട്ടിഫിക്കറ്റ് അപ്‌ലോഡ് ചെയ്തതിനുശേഷം മാത്രമേ യാത്രക്കാരെ ചെക്ക് ഇൻ ചെയ്യാൻ അനുവദിക്കൂ.

    നാട്ടിലെത്തുന്ന എല്ലാ യാത്രക്കാരെയും ഇന്ത്യൻ വിമാനത്താവളങ്ങളിൽ (പോർട്ട് ഓഫ് എൻട്രി) എത്തുമ്പോൾ നിർബന്ധമായും സ്വയം പണമടച്ചുള്ള സ്ഥിരീകരണ തന്മാത്രാ പരിശോധനയ്ക്ക് വിധേയമാക്കും. നിശ്ചിത സ്ഥലത്ത് തന്മാത്രാ പരിശോധനയ്ക്ക് സാമ്പിൾ നൽകിയ ശേഷമേ യാത്രക്കാരെ വിമാനത്താവളത്തിൽ നിന്ന് പുറത്തുകടക്കാൻ അനുവദിക്കൂ. സഊദി അറേബ്യയിൽ നിന്ന് എത്തിച്ചേരുന്ന വിമാനത്താവളത്തിൽ നിന്ന് കണക്ഷൻ വിമാനത്തിൽ മാറ്റിടങ്ങളിലേക്ക് യാത്ര ചെയ്യുന്നവർ നിശ്ചിത സ്ഥലത്ത് സാമ്പിൾ നൽകിയാണ് കണക്റ്റിംഗ് ഫ്ലൈറ്റിലേക്ക് പോകേണ്ടത് തുടങ്ങിയുള്ള നിർദേശങ്ങളാണ് പ്രാബല്യത്തിൽ വരുന്നത്.

    നാട്ടിൽ യാതൊരു നിയന്ത്രണങ്ങളും ഇല്ലാതെ യോഗങ്ങളും മറ്റു പരിപാടികളും കേമമായി നടക്കുന്നതിനിടെയാണ് ചുരുങ്ങിയ ദിവസങ്ങൾ കുടുംബത്തോടൊപ്പം കഴിയാനായി എത്തുന്ന പ്രവാസികളെ ഇത്തരത്തിൽ ബുദ്ധിമുട്ടിക്കുന്നത്. നാട്ടിലെ പല പരിപാടികളും കണ്ടാൽ വൈറസ് പ്രശ്നം അവിടെ ഇല്ലെന്ന അവസ്ഥയിലാണ്. പക്ഷെ, പ്രവാസികൾ എത്തുമ്പോൾ മാത്രം വൈറസ് ഇങ്ങനെ വ്യാപിക്കുമെന്നതിന്റെ മനഃശാസ്ത്രം എന്തായിരിക്കുമെന്നാണ് പ്രവാസികൾ പരസ്പരം ചോദിക്കുന്നത്. ഒരു രാഷ്ട്രീയ പാർട്ടിയും പ്രവാസികൾക്ക് വേണ്ടി ഈ വിഷയത്തിൽ ശബദമുയർത്താത്തതും പ്രവാസികൾക്ക് ഏറെ നിരാശ ഉണ്ടാക്കിയിട്ടുണ്ട്.