ഹ
കണ്ണൂർ
പുന്നോലിലെ സി.പി.എം പ്രവർത്തകൻ കൊരമ്പിൽ താഴെകുനിയിൽ ഹരിദാസനെ വെട്ടിക്കൊലപ്പെടുത്തിയ കേസിൽ ഒരാൾ കൂടി കസ്റ്റഡിയിൽ.
പുന്നോൽ സ്വദേശി നിജിൽദാസ്(34) ആണ് പിടിയിലായത്. കൊലയാളി സംഘത്തിൽപ്പെട്ടയാളാണ് നിജിൽദാസ് എന്ന് പൊലിസ് പറയുന്നു. കൊലപാതകത്തിൽ നേരിട്ടു പങ്കുള്ള ആത്മജ് എന്ന ആർ.എസ്.എസ് പ്രവർത്തകനടക്കം മൂന്നുപേർ കൂടി ഇനി പിടിയിലാകാനുണ്ട്. ഇവർ മാഹി മേഖലയിൽ തന്നെയുള്ളതായാണ് പൊലിസിന് ലഭിച്ച സൂചന.

കടലിൽപ്പോയ ഹരിദാസനെയും കാത്ത് നിജിൽദാസിന്റെ നേതൃത്വത്തിലുള്ള സംഘം മണിക്കൂറുകളാണ് രണ്ടു ബൈക്കുകളിലായി വീട്ടുപരിസരത്ത് നിലയുറപ്പിച്ചത്. ഹരിദാസിനൊപ്പം മത്സ്യബന്ധനത്തിന് പോയ സുനേഷ് ആണ് ഹരിദാസൻ വീട്ടിലേക്കുവരുന്നത് സംബന്ധിച്ച വിവരങ്ങൾ കൊലയാളി സംഘത്തിന് വാട്‌സാപ് വഴി നൽകിയത്.

പുന്നോൽ കൂലോത്ത് ഭഗവതിക്ഷേത്ര ഉത്സവത്തിനിടെയുണ്ടായ സംഘർഷമാണ് കൊലപാതകത്തിലേക്ക് നയിച്ചതെന്നാണ് പൊലിസ് പറയുന്നത്. കേസിലെ സൂത്രധാരനും ബി.ജെ.പി തലശ്ശേരി മണ്ഡലം പ്രസിഡന്റും നഗരസഭാ വാർഡ് കൗൺസിലറുമായ ലിജേഷ് ഉൾപ്പടെ നാല് ആർ.എസ്.എസ് പ്രവർത്തകർ കഴിഞ്ഞദിവസം അറസ്റ്റിലായിരുന്നു. ഇവരെ 14 ദിവസത്തേക്ക് റിമാൻഡ് ചെയ്തു. കൊലപാതക പശ്ചാത്തലത്തിൽ കണ്ണൂരിൽ ഉന്നത പൊലിസ് ഉദ്യോഗസ്ഥരുടെ യോഗം ചേർന്ന് സ്ഥിതിഗതികൾ വിലയിരുത്തി. ഉത്തര മേഖല ഐ.ജി അശോക് യാദവ്, ഡി.ഐ.ജി രാഹുൽ ആർ.നായർ, സിറ്റി പൊലിസ് കമ്മിഷണർ ആർ.ഇളങ്കോ എന്നിവരുടെ നേതൃത്വത്തിലായിരുന്നു യോഗം.