ന്യൂഡൽഹി
ആഡംബര കപ്പലിലെ ലഹരിപ്പാർട്ടിയുമായി ബന്ധപ്പെട്ട് ബോളിവുഡ് നടൻ ഷാരൂഖ് ഖാന്റെ മകൻ ആര്യൻ ഖാനെതിരേ തെളിവില്ലെന്ന് എൻ.സി.ബി പ്രത്യേക അന്വേഷണ സംഘത്തിന്റെ കണ്ടെത്തൽ.
ആര്യൻ ഖാൻ ഗൂഢാലോചനയുടെ ഭാഗമായിരുന്നു എന്നതിനോ അന്താരാഷ്ട്ര ലഹരിക്കടത്ത് സംഘത്തിൽ ഉൾപ്പെട്ടിരുന്നു എന്നതിനോ തെളിവില്ലെന്നും അന്വേഷണ സംഘത്തിന്റെ കണ്ടെത്തലിലുണ്ടെന്നാണ് റിപ്പോർട്ടുകൾ.

ആര്യൻ ഖാനെതിരേ എൻ.സി.ബി മുംബൈ യൂനിറ്റ് നടത്തിയ ആരോപണങ്ങളുടെയെല്ലാം മുനയൊടിക്കുന്നതാണ് പ്രത്യേക അന്വേഷണ സംഘത്തിലെ ചില ഉദ്യോഗസ്ഥരെ ഉദ്ധരിച്ച് ദേശീയ മാധ്യമങ്ങൾ പുറത്തുവിട്ട റിപ്പോർട്ടുകൾ.
ആര്യൻ ഖാൻ ലഹരിവസ്തുക്കൾ സൂക്ഷിച്ചിരുന്നു എന്നതിന് തെളിവില്ലെന്നതിനാൽ മൊബൈൽ കസ്റ്റഡിയിലെടുത്തതും ചാറ്റുകൾ പരിശോധിച്ചതും ചട്ടപ്രകാരമായിരുന്നില്ലെന്നും പ്രത്യേക അന്വേഷണ സംഘം കണ്ടെത്തിയിട്ടുണ്ട്.

റെയ്ഡ് നടപടികൾ ചിത്രീകരിക്കണമെന്ന നാർകോട്ടിക് കൺട്രോൾ ബ്യൂറോയുടെ ചട്ടവും കേസിൽ പാലിക്കപ്പെട്ടിട്ടില്ല. മറ്റു പ്രതികളിൽനിന്ന് കണ്ടെടുത്ത ലഹരിവസ്തുക്കൾ സ്വതന്ത്രമായി കണ്ടെടുത്തതാണെന്നും ഗൂഢാലോചനയില്ലെന്നും അന്വേഷണ ഉദ്യോഗസ്ഥർ കണ്ടെത്തിയിട്ടുണ്ട്. രണ്ട് മാസത്തിനകം അന്വേഷണ റിപ്പോർട്ട് എൻ.സി.ബി ഡയറക്ടർ ജനറൽ എസ്.എൻ പ്രധാന് സമർപ്പിക്കാനാണ് ഡൽഹിയിൽ നിന്നുള്ള പ്രത്യേകസംഘം ആലോചിക്കുന്നത്.
ഇതിനിടെ ആര്യൻ ഖാനെതിരേ തെളിവില്ലെന്ന റിപ്പോർട്ടുകൾ തള്ളി എൻ.സി.ബി ഡെപ്യൂട്ടി ഡയറക്ടർ ജനറൽ സഞ്ജയ് സിങ് രംഗത്തെത്തി. ഇത്തരം റിപ്പോർട്ടുകളെല്ലാം വാസ്തവ വിരുദ്ധവും ഊഹാപോഹവുമാണെന്നാണ് അദ്ദേഹം പ്രതികരിച്ചത്. അന്വേഷണം ഇപ്പോഴും പുരോഗമിക്കുകയാണെന്നും അദ്ദേഹം പറഞ്ഞു. ആര്യൻ ഖാനെതിരേ ഗൂഢാലോചനയ്ക്ക് തെളിവില്ലെന്ന് നേരത്തെ ബോംബൈ ഹൈക്കോടതിയും വ്യക്തമാക്കിയിരുന്നു.