ന്യൂഡൽഹി
ആളുകൾ ജീവനും കൊണ്ടോടുന്ന യുദ്ധഭൂമിയിൽ സുഹൃത്തിന്റെ വളർത്തുനായയെ ഉപേക്ഷിക്കാൻ സാഹിദിന് മനസു വന്നില്ല. അവൻ പോളണ്ടിൽ നിന്ന് ഇന്ത്യൻ വ്യോമസേനയുടെ സി-17 വിമാനത്തിൽ നാട്ടിലേക്കു തിരിക്കുമ്പോൾ അതിനെ കൂടെ കൂട്ടി. പലരും വളർത്തു മൃഗങ്ങളെ ഉപേക്ഷിച്ച് പോയതായും ഡൽഹിയിൽ വിമാനമിറങ്ങിയ സാഹിദ് പറഞ്ഞു. മറ്റൊരു ഇന്ത്യൻ വിദ്യാർഥിയായ ഗൗതം തന്റെ വളർത്തുപൂച്ചയെ ഉക്രൈനിൽ ഉപേക്ഷിക്കാതെയാണ് വന്നത്. വായുസഞ്ചാരമുള്ള ഒരു പ്ലാസ്റ്റിക് കുട്ടയിലാക്കിയാണ് അവൻ പൂച്ചയെ കൊണ്ടുവന്നത്. പൂച്ച നാലുമാസമായി തന്നോടൊപ്പമുണ്ടെന്നും ബങ്കറിൽ കഴിഞ്ഞപ്പോഴും പോളണ്ട് അതിർത്തി കടന്നപ്പോഴും ഇതു തന്നോടൊപ്പമുണ്ടായിരുന്നുവെന്നും ഗൗതം പറഞ്ഞു. ഇരുവരുടെയും മൃഗസ്‌നേഹത്തെ ട്വിറ്ററാറ്റികൾ പ്രശംസിച്ചു.