ഈരാറ്റുപേട്ട: തീക്കോയി ടെക്‌നിക്കല്‍ സ്‌കൂളിനു കുട്ടികളുടെയോ അധ്യാപകരുടെയോ കുറവില്ല. മറിച്ച് കെട്ടിട സൗകര്യം ഇല്ലാത്തതു കാരണം വിദ്യാര്‍ഥികളും അധ്യാപകരും വീര്‍പ്പുമുട്ടുകയാണ്. നൂറ്റമ്പതു വിദ്യാര്‍ഥികള്‍ ഇവിടെ പഠിക്കുന്നുണ്ട്.  
32 വര്‍ഷമായി വാടക കെട്ടിടത്തിലാണ് സ്‌കൂള്‍  പ്രവര്‍ത്തിക്കുന്നത്. ദ്രവിച്ച് നിലം പൊത്താറായ കെട്ടിടത്തിലാണു വര്‍ക്കു ഷോപ്പും മറ്റ് പ്രക്ടിക്കല്‍ ക്ലാസുകളും നടക്കുന്നത്. നൂറു മീറ്റര്‍ മാറി പുതിയ ഷെഡിലാണ് പ്രാക്ടിക്കല്‍ നടക്കുന്നത്. തീയറി കഴിഞ്ഞ് അടുത്ത കെട്ടിടത്തിലേക്ക് പോയി വേണം പ്രാക്ടിക്കല്‍ ക്ലാസിനു പങ്കെടുക്കാന്‍, എന്ത് അസൗകര്യമാണങ്കിലും 13 വര്‍ഷമായി ഈ സ്‌കൂളിന് നൂറുമെനി വിജയമാണ്.
  മൂന്നു വര്‍ഷമായി സ്‌കൂള്‍ ഇംഗ്ലീഷ് മീഡിയമായാണു പ്രവര്‍ത്തിക്കുന്നത്.  ഈരാറ്റുപേട്ട നഗരസഭ പരിധിയില്‍ രണ്ടേക്കര്‍ സ്ഥലം സ്‌കൂള്‍ കെട്ടിടം പണിയുന്നതിനായി സ്വന്തമായി വാങ്ങിയിട്ടുണ്ട്. ഇവിടെ കെട്ടിടം നിര്‍മിക്കുന്നതിനു ഇതുവരെയും അധികൃതര്‍ തയ്യാറായിട്ടില്ല. കെട്ടിടം പണിക്കാവശ്യമായ ഫണ്ടും അനുവദിച്ചിട്ടുണ്ട്.  മുന്നൂറു കുട്ടികള്‍ പഠിക്കണ്ട ഇവിടെ ഇപ്പോഴുള്ളത് നൂറ്റമ്പതു പേരാണ് .  
പുതിയ കെട്ടിടം നിര്‍മിക്കുന്നതിന് സര്‍ക്കാരില്‍ സമ്മര്‍ദം ചെലുത്തുന്നതിന് പി.ടി.എയുടെ നേതൃത്വത്തില്‍ കമ്മിറ്റി രൂപവല്‍ക്കരിച്ചിട്ടുണ്ട്. നിലവിലെ സാഹചര്യങ്ങളും, കെട്ടിടം നിര്‍മിക്കുന്നതിനുള്ള ആവശ്യകതയുംബോധ്യപ്പെടുത്തുന്നതിനാവശ്യമായ അപേക്ഷയും സ്‌കെച്ചും പ്ലാനുമായി സര്‍ക്കാരിനെ സമീപിക്കുമെന്ന് പ.ടി.എ പ്രസിഡന്റ് മുഹമ്മദ് ഷാഫി പറഞ്ഞു.