പി.കെ മുഹമ്മദ് ഹാത്തിഫ്
കോഴിക്കോട്
സംസ്ഥാനത്ത് പ്രൊഫസർ പദവിക്കായി അപേക്ഷ നൽകിയത് സർക്കാർ കോളജുകളിലെ 152 അധ്യാപകർ. നിശ്ചിത കാലയളവിനുള്ളിൽ യു.ജി.സിയുടെ അംഗീകൃത ജേർണൽ പട്ടികയിലുള്ള പത്ത് ഗവേഷണ പ്രസിദ്ധീകരണങ്ങളുള്ളവരെയാണ് പ്രൊഫസർ പദവിക്ക് പരിഗണിക്കുന്നത്. യു.ജി.സി 2018ൽ കോളജ് അധ്യാപകർക്ക് പ്രൊഫസർ പദവി അനുവദിച്ചുവെങ്കിലും കേരളത്തിൽ 2021 ലാണ് നടപ്പാക്കിയത്.
പ്രൊഫസർ പദവിക്കായുള്ള അഭിമുഖം ഈ മാസം 14 മുതൽ 18 വരെ തിരുവനന്തപുരത്ത് നടക്കും. ഇതിന് മുന്നോടിയായി ഗവേഷണ ലേഖനങ്ങളുടെ ഡിജിറ്റൽ പകർപ്പ് മാർച്ച് ഏഴിനു മുൻപ് പരിശോധനയ്ക്ക് എത്തിക്കണമെന്ന് പ്രിൻസിപ്പൽമാർക്ക് കോളജ് വിദ്യാഭ്യാസ വകുപ്പ് നിർദേശം നൽകി.
സർവിസിലുള്ളവരെ മാത്രമേ അഭിമുഖത്തിന് ക്ഷണിക്കാൻ യു.ജി.സി ചട്ടത്തിൽ വ്യവസ്ഥയുള്ളു. എന്നാൽ കാലിക്കറ്റും എം.ജിയും വിരമിച്ചവർക്കും മുൻകാലപ്രാബല്യത്തിൽ പ്രൊഫസർ പദവി നൽകാൻ തീരുമാനിച്ചിട്ടുണ്ട്. അപേക്ഷിച്ച 152ൽ 20 പേരാണ് സർവിസിൽനിന്നു വിരമിച്ചവർ. കൂടാതെ അപേക്ഷ സമർപ്പിച്ച ഭൂരിഭാഗം പേരുടേയും ഗവേഷണ പ്രബന്ധങ്ങൾ കോപ്പിയടിച്ചതാണെന്ന് നേരത്തെ കണ്ടെത്തിയിരുന്നു.
2016 മുതൽ പ്രബന്ധങ്ങൾ പ്രസിദ്ധീകരിച്ചതായ വ്യാജരേഖ തയാറാക്കി നൽകുന്ന ഡൽഹി കേന്ദ്രീകരിച്ച് പ്രവർത്തിക്കുന്ന ചില സ്ഥാപനങ്ങളുടെ ജേർണലുകളാണ് ഏറെ അധ്യാപകരും അപേക്ഷകളോടൊപ്പം സമർപ്പിച്ചിരിക്കുന്നതെന്നാണ് കണ്ടെത്തൽ.
സമർപ്പിച്ച പ്രസിദ്ധീകരണങ്ങളിലെ കോപ്പിയടി പരിശോധിക്കാതെ പ്രൊഫസർ പദവി നൽകണമെന്നാവശ്യപ്പെട്ട് അധ്യാപക സംഘടനകൾ കോളജ് വിദ്യാഭ്യാസ ഡയറക്ടറുടെ മേൽ സമ്മർദ്ദം ശക്തമാക്കിയിട്ടുണ്ട്. അതേസമയം ഇത് അംഗീകരിക്കരുതെന്നും പ്രൊഫസർ തസ്തികയ്ക്ക് അപേക്ഷയോടൊപ്പം അധ്യാപകർ സമർപ്പിച്ചിട്ടുള്ള 2016 മുതലുള്ള എല്ലാ ഗവേഷണ പ്രസിദ്ധീകരണങ്ങളും അഭിമുഖത്തിന് മുൻപ് പരിശോധിക്കണമെന്ന ആവശ്യവും ശക്തമാണ്.