റിയാദ്: റിയാദിൽ എണ്ണ ശുദ്ധീകരണ ശാലക്ക് നേരെ ഡ്രോൺ ആക്രമണം. വ്യാഴാഴ്ച പുലർച്ചെ ഏകദേശം നാല് നാൽപ്പതിനാണ് റിയാദിലെ എണ്ണ ശുദ്ധീകരണശാലയിൽ ഡ്രോൺ ഉപയോഗിച്ച് ഭീകരാക്രമണം നടന്നതെന്ന് സഊദി ഊർജ മന്ത്രാലയം വെളിപ്പെടുത്തി.

ആക്രമണത്തെ തുടർന്ന് എണ്ണ ശുദ്ധീകരണ ശാലക്ക് തീപ്പിടുത്തം ഉണ്ടായെങ്കിലും തീപിടിത്തം നിയന്ത്രണവിധേയമായെന്നും പരിക്കുകളോ മരണങ്ങളോ ഉണ്ടായിട്ടില്ലെന്നും റിഫൈനറിയുടെ പ്രവർത്തനങ്ങളെയും പെട്രോളിയത്തിന്റെയും മറ്റു ഉൽപ്പന്നങ്ങളുടെയും വിതരണത്തെയും ബാധിച്ചിട്ടില്ലെന്നും മന്ത്രാലയം വിശദീകരിച്ചു.