ചെറുതുരുത്തി: കേരള കലാമണ്ഡലത്തിന്റെ ചെയര്‍മാനായിരുന്ന ഒ.എന്‍.വി കുറുപ്പിന് പ്രണാമമര്‍പ്പിച്ച് കലാമണ്ഡലത്തില്‍ ഒ.എന്‍.വി കവിതകളിലെ വിവിധ പ്രമേയങ്ങളെ കുറിച്ചുള്ള സെമിനാറും, ഒ.എന്‍.വി കവിതകളെ ആസ്പദമാക്കി ദൃശ്യാവിഷ്‌കാരവും നടന്നു. സ്മൃതി ലഹരി എന്ന കവിത വിന്ദുജ മേനോന്‍ പറയന്‍ തുള്ളലായും, ഭൂമിക്കൊരു ചരമഗീതം എന്ന കവിത കലാമണ്ഡലം എം.എ നൃത്ത വിദ്യാര്‍ഥികള്‍ നൃത്തശില്‍പമായും,  കേശമിതു കണ്ടു നീ എന്ന കവിത കലാമണ്ഡലം രാജശേഖരന്റെ നേതൃത്വത്തില്‍ എം.എ കഥകളി വിഭാഗം വിദ്യാര്‍ഥികള്‍ കഥകളിയായും അരങ്ങിലെത്തിച്ചു.
നിറഞ്ഞ കയ്യടിയോടെയാണ് വിദ്യാര്‍ഥികളും കലാസ്വാദകരും ദൃശ്യാവിഷ്‌കാരത്തെ വരവേറ്റത്. വൈസ് ചാന്‍സലര്‍ ഡോ. ദിലീപ്കുമാര്‍, രജിസ്ട്രാര്‍ ഡോ: കെ.കെ സുന്ദരേശന്‍, അക്കാദമിക് ഡയറക്ടര്‍ ഡോ. സി.എം നീലകണ്ഠന്‍ തുടങ്ങിയവര്‍ നേതൃത്വം നല്‍കി.