ഒരു ശരാശരി വ്യക്തിക്ക് ഭക്ഷണമില്ലാതെ ദിവസങ്ങളോളം ജീവൻ നിലനിർത്താൻ സാധിക്കും. മൂന്ന് ദിവസം വെള്ളമില്ലാതെയും ജീവിക്കാനാകും. പക്ഷേ വായു ഇല്ലാതെ മിനുട്ടുകൾക്ക് അപ്പുറത്തേക്ക് പോകാനാവില്ല. മനുഷ്യർക്കും ജീവികൾക്കും ജീവൻ നിലനിർത്താൻ വായു ഏറെ പ്രധാനപ്പെട്ടതാണ്. എന്നിട്ടും, കഴിഞ്ഞ വർഷം, ലോകത്തിലെ 10 രാജ്യങ്ങളിലും ആഗോള നഗരങ്ങളിൽ 9 ശതമാനത്തിലും മാത്രമേ വായുവിൻ്റെ ഗുണനിലവാരം മെച്ചപ്പെട്ടത് ഒള്ളൂവെന്നാണ് പുതിയ കണ്ടെത്തൽ. ഫ്രഞ്ച് പോളിനേഷ്യ, മൗറീഷ്യസ്, ഐസ്ലാൻഡ് എന്നിവയാണ് ഏറ്റവും കുറഞ്ഞ വായു മലിനീകരണം ഉള്ള രാജ്യങ്ങൾ. 

മിഡിൽ ഈസ്റ്റ്, ആഫ്രിക്ക, മധ്യ-ദക്ഷിണേഷ്യ എന്നിവിടങ്ങളിലെ ചില സ്ഥലങ്ങളാണ് വായു ഗുണനിലവാരം ഏറ്റവും കൂടുതൽ ബാധിച്ചത്. ലോകമെമ്പാടുമുള്ള എയർ സെൻസർ ഡാറ്റ ശേഖരിക്കുന്ന സ്വിസ് എയർ ക്വാളിറ്റി ടെക്‌നോളജി കമ്പനിയായ IQAir ൻ്റെ റിപ്പോർട്ട് അനുസരിച്ച്, ജനസംഖ്യ അനുസരിച്ച് 2023 ൽ ഏറ്റവും മലിനമായ വായു ഉള്ള അഞ്ച് രാജ്യങ്ങളായി ബംഗ്ലാദേശ്, പാകിസ്ഥാൻ, ഇന്ത്യ, താജിക്കിസ്ഥാൻ, ബുർക്കിന ഫാസോ എന്നിവ റാങ്ക് ചെയ്യപ്പെട്ടു. (ഉപ-സഹാറൻ ആഫ്രിക്കയിലെ ചിത്രം അപൂർണ്ണമാണെന്ന് റിപ്പോർട്ട് മുന്നറിയിപ്പ് നൽകുന്നു, എന്നിരുന്നാലും, 54 രാജ്യങ്ങളിൽ 24 എണ്ണത്തിൽ മാത്രമേ ഉൾപ്പെടുത്താൻ മതിയായ ഡാറ്റ ഉണ്ടായിരുന്നുള്ളൂ.) 

ഏറ്റവും മോശം വായു ഉള്ള തലസ്ഥാന നഗരങ്ങളിൽ മുന്നിൽ ന്യൂഡൽഹി ആണ്. ബംഗ്ലാദേശ് തലസ്ഥാനം ധാക്ക, ബുർക്കിന ഫാസോ തലസ്ഥാനം ഔഗാഡൗഗൗ, താജിക്കിസ്ഥാൻ തലസ്ഥാനം ദുഷാൻബെ, ഇറാഖ് തലസ്ഥാനം ബാഗ്ദാദ് എന്നിവയാണ് തൊട്ടുപുറകിൽ എന്ന്  IQAir റിപ്പോർട്ട് പറയുന്നു. വായു ഗുണനിലവാരം കാത്തുസൂക്ഷിക്കുന്ന തലസ്ഥാനങ്ങൾ കൂടുതലും ഓഷ്യാനിയ, സ്കാൻഡിനേവിയ, കരീബിയൻ എന്നിവിടങ്ങളിലായിരുന്നു. കൂടാതെ ന്യൂസിലാൻഡിലെ വെല്ലിംഗ്ടണും, ഐസ്ലാൻഡ് തലസ്ഥാനം റെയ്ക്ജാവിക്, ബർമുഡ തലസ്ഥാനം ഹാമിൽട്ടൺ എന്നിവയും വായു നിലവാരം മെച്ചപ്പെടുത്തുന്നതിൽ മുന്നിലാണ്.

വായു മലിനീകരണത്തിൻ്റെ ഏറ്റവും സാധാരണമായ രൂപങ്ങളിലൊന്നായ PM2.5, മറ്റേതൊരു മലിനീകരണത്തേക്കാൾ കൂടുതൽ ആളുകളെ കൊല്ലുന്നതായി IQAir-ൻ്റെ വടക്കേ അമേരിക്കൻ ഡിവിഷൻ സിഇഒ, ഗ്ലോറി ഡോൾഫിൻ ഹാംസ് പറയുന്നു. ലോകാരോഗ്യ സംഘടനയുടെ കണക്കനുസരിച്ച്, പ്രാഥമികമായി PM2.5 മൂലമുണ്ടാകുന്ന ബാഹ്യ വായു മലിനീകരണം, ലോകമെമ്പാടുമുള്ള 4 ദശലക്ഷത്തിലധികം ആളുകളുടെ ആദ്യകാല മരണത്തിന് കാരണമാകുന്നു. 

ബംഗ്ലാദേശിലെ ഇഷ്ടിക ചൂളകൾ മുതൽ ലാറ്റിനമേരിക്കയിലെ ഖനനം വരെ വായു മലിനീകരണത്തിന് കാരണമാകുന്നുണ്ട്. കൽക്കരി, എണ്ണ, വാതകം തുടങ്ങിയ ഫോസിൽ ഇന്ധനങ്ങൾ കത്തിക്കുന്നതാണ് പ്രധാന ഉറവിടം. ജർമ്മനിയിലെ മാക്സ് പ്ലാങ്ക് ഇൻസ്റ്റിറ്റ്യൂട്ട് ഫോർ കെമിസ്ട്രിയിലെ ഒരു ഗവേഷകൻ്റെ നേതൃത്വത്തിൽ നടത്തിയ ഒരു പ്രത്യേക വിശകലനത്തിൽ 65 ശതമാനം മരണങ്ങൾക്കും കാരണം ഫോസിൽ ഇന്ധനങ്ങളാണെന്ന് കണ്ടെത്തി.