കാഞ്ഞങ്ങാട്: നിത്യാനന്ദ പോളിടെക്‌നിക്ക് കോളജില്‍ എസ്.എഫ്.ഐ-എ.ബി.വി.പി പ്രവര്‍ത്തകര്‍ തമ്മിലുണ്ടായ സംഘര്‍ഷത്തില്‍ 14 പേര്‍ക്കെതിരേ കാഞ്ഞങ്ങാട് പൊലിസ് കേസെടുത്തു. കഴിഞ്ഞ ദിവസം വൈകുന്നേരമാണ് വിദ്യാര്‍ഥികള്‍ തമ്മില്‍ സംഘര്‍ഷമുണ്ടായത്.
സംഭവത്തെ തുടര്‍ന്ന് എസ്.എഫ്.ഐ പ്രവര്‍ത്തകനായ പ്രണവിനും എ.ബി.വി.പി പ്രവര്‍ത്തകനായ രാജപുരത്തെ ശ്രീഹരിക്കും പരുക്കേറ്റിരുന്നു. ഇരുവരും പോളിടെക്‌നിക്കിലെ വിദ്യാര്‍ഥികളാണ്.
കാംപസിനകത്തെ സംഘടനാ  പ്രവര്‍ത്തനവുമായി ബന്ധപ്പെട്ട വാക്കുതര്‍ക്കമാണു സംഘര്‍ഷത്തില്‍ കലാശിച്ചത്. പ്രണവിന്റെ പരാതിയില്‍ എ.ബി.വി.പി പ്രവര്‍ത്തകരായ ശ്രീഹരി, ആനന്ദ്, അഭിജിത് എന്നിവരടക്കം ആറു പേര്‍ക്കെതിരേയും ശ്രീഹരിയുടെ പരാതിയില്‍ എസ്.എഫ്.ഐ  പ്രവര്‍ത്തകരായ പ്രണവ്, ശബരീഷ്, സുരാജ്, അക്ഷയ്, രോഹിത് തുടങ്ങി എട്ടു പേര്‍ക്കെതിരേയുമാണ് കേസെടുത്തത്.