കോഴിക്കോട്
കേരളത്തിൽ ആദ്യമായി തിരമാലകൾക്ക് മുകളിലൂടെ കടലിലേക്ക് കാൽനട സവാരിയായ ഫ്ലോട്ടിങ് ബ്രിഡ്ജ് അഥവാ ഒഴുകുന്ന പാലം ബേപ്പൂരിൽ ഇന്നു മുതൽ പ്രവർത്തനം ആരംഭിക്കും. ബേപ്പൂർ പുലിമുട്ട് വിനോദസഞ്ചാര കേന്ദ്രത്തിന് സമീപത്താണ് കടലിലേക്ക് 100 മീറ്ററോളം കാൽനടയായി സവാരി ചെയ്യാൻ ഉതകുന്ന രീതിയിൽ ഫ്ലോട്ടിങ് ബ്രിഡ്ജ് സ്ഥാപിച്ചിട്ടുള്ളത്. തിരമാലകൾക്ക് അനുസരിച്ച് ഉയർന്നുപൊങ്ങിയും ആടിയുലഞ്ഞുമാണ് കടലിലേക്കുള്ള കാൽനടയാത്ര. അഡ്വഞ്ചർ ടൂറിസം പ്രോത്സാഹിപ്പിക്കുന്നതിന്റെ ഭാഗമായി ഡിസ്ട്രിക്ട് ടൂറിസം പ്രമോഷൻ കൗൺസിലും ബേപ്പൂർ പോർട്ട് അതോറിറ്റിയും മുൻകൈയ്യെടുത്താണ് സംരംഭത്തിന് തുടക്കം കുറിക്കുന്നത്. ചാലക്കുടിയിലെ പ്രവാസി കൂട്ടായ്മയായ ക്യാപ്ചർ ഡേയ്സ് അഡ്വഞ്ചർ ടൂറിസം ആൻഡ് വാട്ടർ സ്പോർട്സ് സംരംഭകരാണ് ഫ്ലോട്ടിങ് ബ്രിഡ്ജ് ഒരുക്കുന്നത്. രാവിലെ 10 മുതൽ വൈകിട്ട് 6വരെയാണ് പ്രവേശനം. 100 രൂപയാണ് പ്രവേശന ഫീസ്. അഞ്ച് വയസിൽ താഴെയുള്ള കുട്ടികൾക്കും പ്രായമായവർക്കും ഭിന്നശേഷിക്കാർക്കും ലഹരി ഉപയോഗിച്ചവർക്കും പ്രവേശനം അനുവദിക്കുന്നതല്ലെന്ന് ബന്ധപ്പെട്ടവർ അറിയിച്ചു.