മലമ്പുഴ: മലമ്പുഴയില്‍ യു.ഡി.എഫിന്റെ വോട്ടുകള്‍ ബി.ജെ.പിക്ക് വിറ്റെന്ന് മലമ്പുഴ നിയോജക മണ്ഡലം എല്‍.ഡി.എഫ് സ്ഥാനാര്‍ഥി എ. പ്രഭാകരന്‍. എന്നാലും തങ്ങള്‍ക്ക് ഭീഷണിയില്ലെന്നും അദ്ദേഹം പറഞ്ഞു. നല്ല മാര്‍ജിനില്‍ തന്നെ വിജയിക്കും. ബി.ജെ.പി രണ്ടാം സ്ഥാനത്തെത്തും.

പല പ്രദേശത്തും നിഷ്‌ക്രിയരായി നില്‍ക്കുന്നവരെ സ്വാധീനിക്കാന്‍ ബി.ജെ.പി സ്ഥാനാര്‍ഥി സി. കൃഷ്ണകുമാറിന്റെ നേതൃത്വത്തില്‍ ശ്രമം നടന്നിട്ടുണ്ട്. ബി.ജെ.പിയും കോണ്‍ഗ്രസും ചേര്‍ന്നൊരുമിച്ചാല്‍ പോലും അതിനെ മറികടക്കുന്ന വിജയം നേടുമെന്ന് അദ്ദേഹം പറഞ്ഞു.

എന്നാല്‍ ല്‍.ഡി.എഫ് സ്ഥാനാര്‍ഥി എ. പ്രഭാകരന്റെ വാദത്തെ തള്ളി ബി.ജെ.പി സ്ഥാനാര്‍ഥി രംഗത്തെത്തി. വോട്ടുകച്ചവടം നടന്നിട്ടില്ലെന്നും വിജയപ്രതീക്ഷയുണ്ടെന്നും സി. കൃഷ്ണകുമാര്‍ പറഞ്ഞു.

അതേസമയം, വോട്ടുമറിച്ചെന്ന വാദം തെറ്റാണെന്ന് യു.ഡി.എഫ് സ്ഥാനാര്‍ഥി എസ്.കെ അനന്തകൃഷ്ണന്‍ പറഞ്ഞു. ആരുമായും കൂട്ടുകെട്ടില്ല. തികഞ്ഞ ശുഭപ്രതീക്ഷയാണ് കഴിഞ്ഞ മാസത്തെ പര്യടനം എനിക്ക് നല്‍കുന്നത്. വോട്ടര്‍മാര്‍ക്ക് മണ്ഡലം ഇടതുപക്ഷത്തുനിന്ന് മാറണമെന്നുണ്ട്. 50 വര്‍ഷം ഇവിടെ ഭരിച്ച ഇടതുപക്ഷം കാര്യമായ ഒരു മാറ്റവും കൊണ്ടുവന്നില്ല. അതുകൊണ്ടുതന്നെ ഇത്തവണ കൃത്യമായി പ്രവര്‍ത്തിച്ചതിനാല്‍ ജയമുണ്ടെന്നും അനന്തകൃഷ്ണന്‍ പറഞ്ഞു.