കോഴിക്കോട്: ഇരുപത്തിയഞ്ചാമത് നാഷണൽ ഫെഡറേഷൻ കപ്പ് സീനിയർ അത് ലറ്റിക്സ് ചാംപ്യൻഷിപ്പിന് ആദ്യമായി കേരളം വേദിയായതോടെ അഭിമാനകരമായ ഒരു നേട്ടം കൂടി സംസ്ഥാനം ആർജിച്ചിരിക്കുന്നു .രാജ്യത്തിന് ഒട്ടേറെ കായികതാരങ്ങളെ സംഭാവന ചെയ്ത കേരളത്തിൽ 25 വർഷത്തിനിടെ ഇതാദ്യമായാണ് ഫെഡറേഷൻ കപ്പ് സീനിയർ അത് ലറ്റിക്സ് ചാംപ്യൻഷിപ്പ് അരങ്ങേറുന്നത്.

നിലവിലെ ഫെഡറേഷൻ കപ്പ് സീനിയർ അത് ലറ്റിക് ചാംപ്യൻഷിപ്പിനായി രൂപീകരിച്ച കമ്മിറ്റി മികച്ച കാഴ്ചപ്പാടുകളിലൂടെ വലിയ മാറ്റങ്ങളോടെയാണ് ഇത്തവണ കായിക മേള നടത്തുന്നത്.500ലേറെ താരങ്ങളാണ്  മാറ്റുരക്കാൻ എത്തിയത് .സ്പോർട്സ് കൗൺസിൽ മേധാവി സക്കീർ ഹുസയ്ൻ ഉൾപ്പെടെയുള്ളവരുടെ കഴിവുറ്റ നേതൃത്വവും സമർപ്പണ ബോധവുമാണ് ഈ കായികമേളയെ വൻ വിജയത്തിലേക്ക് നയിച്ചത് .

അതേസമയം കേരളത്തിലെ കായികമേഖല നേരിടുന്ന പരിമിതികളേറെയാണ്.വിദ​ഗ്ധപരിശീലനം നൽകാനുള്ള സംവിധാനം ഇല്ലാത്തതാണ് പ്രധാന പ്രശ്നം .കേരളത്തിൽ ഇപ്പോൾ സീനിയർ കായിക താരങ്ങൾ യൂനിവേഴ്സിറ്റി സ്റ്റേഡിയം ആണ് എല്ലാ ആവശ്യങ്ങൾക്കും ഉപയോ​ഗിക്കുന്നത് . കേരളത്തിന്റെ കായിക മുന്നേറ്റത്തിന് ഭൂമി കിട്ടാൻ കേരള സംസ്ഥാന അത് ലറ്റിക്സ് അസോസിയേഷൻ പരമാവധി പരിശ്രമിച്ചു വരികയാണ്. അസോസിയേഷന്റെ കീഴിൽ വിവിധ വികസന പദ്ധതികൾ ആവിഷ്കരിക്കാൻ ആഷിക്ക് ഐനിക്കര നയിക്കുന്ന പ്ലാനിംഗ് കമ്മറ്റി സജീവമാണ് .

കായിക മേഖലയിൽ കേരളത്തിന്റെ സാദ്ധ്യതകൾ അപാരമാണ്. ഇപ്പോഴത്തെ തലമുറയിൽ തന്നെ ടിന്റു ലൂക്ക, ജിസ്നാ മാത്യു, ഇർഫാൻ, മുഹമ്മദ് അനസ്, കുഞ്ഞുമുഹമ്മദ്, ആൻസി സോജൻ എന്നിവരൊക്കെ കേരളത്തിന്റെ അഭിമാനതാരങ്ങളാണ്. ഇന്ത്യയിൽ ഏറ്റവും അധികം ബഹുമതികൾ പത്മശ്രീയും അർജുന അവാർഡും ഉൾപ്പെടെ വാരിക്കൂട്ടിയ പ്രതിഭകൾ നമുക്കുണ്ടായിരുന്നു .അഞ്ജു ജോർജ്, എംഡി വൽസമ്മ, മെഴ്സിക്കുട്ടൻ, സാറാമ്മ, ഷൈനി വിൽസൻ, സുരേഷ് ബാബു, അങ്ങനെ എത്രയെത്ര മഹാ താരങ്ങൾ അസൗകര്യങ്ങൾക്കിടയിലും നമുക്ക് അഭിമാനവും അന്തസ്സും നേടിത്തന്നു .

ഇന്ത്യൻ അത്ലറ്റിക്സിൽ കേരളത്തിന്റെ പങ്ക് നിർണായകമാണ് . ടി സി യോഹന്നാൻ മുതൽ
ശങ്കർ വരെയും പി.ടി ഉഷ മുതൽ ആൻസി സോജൻ വരെയുമുള്ള നീണ്ട താരനിര ഇതിന് സാക്ഷ്യം വഹിക്കുന്നു. കേരളത്തിന്റെ ഈ പാരമ്പര്യമാണ് ഇന്ത്യൻ അതിറ്റിക്സിനെ സമ്പന്നമാക്കുന്ന പ്രധാന ഘടകം. അത് ലറ്റിക്സിലെ ഈ മികവ് സീനിയർസിൽ മാത്രമല്ല ജൂനിയർ വിഭാഗത്തിലും പ്രകടമാണ്. അന്തർദേശിയ തലത്തിൽ ഇന്ത്യയുടെ നേട്ടങ്ങൾക്ക് പിറകിലെല്ലാം കേരളത്തിന്റെ കയ്യും കാലും കാണാം.എന്നാൽ കേരളത്തിനു ഈ രംഗത്ത് ഇതിനേക്കാൾ ഇനിയും ഒരു പാട് ഉയരാൻ കഴിയും.

ഇപ്പോൾ ഒരു വർഷമായി അധികാരമേറ്റ സംസ്ഥാന അത് ലറ്റിക്സ് അസോസിയേഷന്റെ പുതിയ കമ്മറ്റി നവീന കാഴ്ച്ചപ്പാടിലൂടെ വിവിധങ്ങളായ മാറ്റങ്ങൾക്കും സംരംഭങ്ങൾക്കും നാന്ദി കുറിച്ചിച്ചിരിക്കുകയാണ്‌. മുഖ്യമന്ത്രി പിണറായി വിജയന് സംസ്ഥാന അത് ലറ്റിക്സ് അസോസിയേഷൻ ആധുനിക രീതിയിലുള്ള ഒരു സ്പോർട്സ് കോംപ്ലക്സിനുള്ള ഭൂമിക്കായി നിവേദനം നൽകിയിട്ടുണ്ട് .എല്ലാ നിലക്കും മികവാർന്ന നല്ലൊരു കായിക ട്രെയിനിങ് അക്കാദമി എല്ലാ ആധുനിക സൗകാര്യങ്ങളോടും കൂടി സ്ഥാപിക്കാനാണ് അസോസിയേഷൻ തീരുമാനിച്ചിരിക്കുന്നത് . അത് ലറ്റിക്സ് അക്കാദമിക്ക് പുറമെ നിലവാരമുള്ള ഒരു ഇന്റർനാഷണൽ സ്‌കൂളും അസോസിയേഷൻ ആസ്ഥാനവും ഉൾക്കൊള്ളുന്നതാണ് പുതിയ പദ്ധതി.