മലപ്പുറം: നിലമ്പൂര്‍ തേള്‍പ്പാറയില്‍ ജനവാസമേഖലയിലിറങ്ങിയ കരടി കൂട്ടിലായി. തേള്‍ പാറ കുറുംമ്പ ക്ഷേത്ര മുറ്റത്ത് വനം വകുപ്പ് സ്ഥാപിച്ച കൂട്ടിലാണ് ചൊവ്വാഴ്ച്ച അര്‍ധരാത്രിയോടെ കരടി പെട്ടത്. ജനവാസ മേഖലയില്‍ കരടിയുടെ ശല്യം രൂക്ഷമായതോടെയാണ് വനം വകുപ്പ് കൂട് സ്ഥാപിച്ചത്. വനം വകുപ്പ് ഉദ്യോഗസ്ഥര്‍ സ്ഥലത്തെത്തി കരടിയെ നെടുങ്കയം ഫോറസ്റ്റ് സ്റ്റേഷനിലേക്ക് കൊണ്ടുപോയി. 

ഒരുമാസം മുമ്പാണ് വനംവകുപ്പ് കൂട് സ്ഥാപിച്ചത്. മൂന്നുകൂടുകളായിരുന്നു സ്ഥാപിച്ചത്. ജനവാസമേഖലയില്‍ ഇറങ്ങിയെ കരടിയുടെ ആക്രമണം സ്ഥിരമായതോടെ നാട്ടുകാര്‍ പരാതിപ്പെടുകയായിരുന്നു.

അതേസമയം, സംസ്ഥാനത്ത് വന്യജീവി ആക്രമണം തുടരുന്ന പശ്ചാത്തലത്തില്‍ വനംമന്ത്രിയുടെ നേതൃത്വത്തില്‍ ഇന്ന് ഉന്നത തല യോഗം ചേരും. വനംവകുപ്പ് ആസ്ഥാനത്ത് ഉച്ചയ്ക്ക് രണ്ട് മണിക്കാണ് യോഗം. ചീഫ് വൈല്‍ഡ് ലൈഫ് വാര്‍ഡന്‍ ഉള്‍പ്പെടെ എല്ലാ വിഭാഗം വനം വകുപ്പിലെ ഉദ്യോഗസ്ഥരും വനം വകുപ്പ് ആസ്ഥാനത്ത് നടക്കുന്ന യോഗത്തില്‍ പങ്കെടുക്കും.