യുഎസ്: ഗൾഫ് ഓഫ് മെക്‌സിക്കോയെ ഗൾഫ് ഓഫ് അമേരിക്ക എന്ന് മാറ്റി വിളിച്ച് ​ഗൂ​ഗ്ൾ. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഉത്തരവിനെ തുടർന്നാണ് പേരുമാറ്റൽ നടപടി.  യുഎസ് ജിയോളജിക്കൽ സർവേയുടെ ജിയോഗ്രാഫിക് നെയിംസ് ഇൻഫർമേഷൻ സിസ്റ്റം അടിസ്ഥാനപ്പെടുത്തിയാണ്​ പേര്​ മാറ്റിയതെന്ന്​ ഗൂഗിൾ അറിയിച്ചു. മെക്‌സിക്കോയുടെ കിഴക്കൻ തീരത്തും യുഎസിൻറെ ദക്ഷിണ ഭാഗത്തുമായി വ്യാപിച്ചുകിടക്കുന്ന കടലാണ്​ ഗൾഫ്​ ഓഫ്​ മെക്സിക്കോ. 

ഗൾഫ് ഓഫ് മെക്സിക്കോയെ ഗൾഫ് ഓഫ് അമേരിക്ക എന്ന് പുനർനാമകരണം ചെയ്യുന്ന എക്സിക്യൂട്ടീവ് ഉത്തരവിൽ ട്രംപ് ഞായറാഴ്ച ഒപ്പുവച്ചു. ഫെബ്രുവരി ഒമ്പത്​ ‘ഗൾഫ് ഓഫ് അമേരിക്ക ദിന’മായും ട്രംപ് പ്രഖ്യാപിച്ചു.

നിലവിൽ യു.എസിലെ ഉപയോക്താക്കൾക്ക് മാത്രമാണ് ലഭ്യമാകുക. അതായത് യു.എസിലെ ഉപയോക്താക്കൾക്ക്​ മാപ്പിൽ ‘ഗൾഫ് ഓഫ് അമേരിക്ക’ എന്നാണ്​ കാണാനാവുക. അതേസമയം മെക്സിക്കോയിലുള്ളവർക്ക്​ നേരത്തേയുള്ള യഥാർഥ പേര് തന്നെ കാണുകയും ചെയ്യാം. രണ്ട് രാജ്യങ്ങൾക്ക് പുറത്തുള്ള ഉപയോക്താക്കൾക്കാവട്ടേ  യാഥാർഥ പേരിനൊപ്പം ബ്രാക്കറ്റിലായി ഗൾഫ്​ ഓഫ്​ അമേരിക്ക എന്നും കാണിക്കും. എന്നാൽ ആപ്പിളിൻറെ മാപ്‌സിൽ പേരുമാറ്റം വന്നിട്ടില്ല. ഇത്​ കൂടാതെ വടക്കേ അമേരിക്കയിലെ ഏറ്റവും ഉയരം കൂടിയ കൊടുമുടിയായ അലാസ്കയിലെ ഡെനാലി പർവതത്തിൻറെ പേര് മക്കിൻലി പർവതം എന്നാക്കിയിട്ടുണ്ട്​.

ഗൾഫ് ഓഫ് മെക്സികോ എന്ന പേര്​ നൂറ്റാണ്ടുകളായി ഉപയോഗിക്കുന്നതാണ്​. അതാണിപ്പോൾ ട്രംപ്​ പുനർനാമകരണം ചെയ്തിരിക്കുന്നത്​. ട്രംപ് ഭരണകൂടവും മെക്‌സിക്കോയും തമ്മിലുള്ള പോര്​ രൂക്ഷമായ സാഹചര്യത്തിലാണ് പേരുമാറ്റൽ നടപടി നടപ്പിൽ വന്നിരിക്കുന്നത്. മെക്സിക്കോയിൽനിന്നുള്ള ചരക്കുകൾക്ക് 25 ശതമാനം നികുതി ചുമത്തുമെന്ന് ട്രംപ്​ അടുത്തിടെ ഭീഷണി മുഴക്കിയിരുന്നു. എന്നാൽ, 10,000 നാഷണൽ ഗാർഡ് സൈനികരെ അതിർത്തിയിലേക്ക് അയയ്ക്കാൻ മെക്സികോ സമ്മതിച്ചതിനെത്തുടർന്ന് ഈ നടപടി താൽക്കാലികമായി നിർത്തി വെച്ചിരിക്കുകയാണ്​.