ന്യൂഡൽഹി: എൻജിനീയറിങ് പ്രവേശനപരീക്ഷയായ ജെ.ഇ.ഇ മെയിൻ സെഷൻ 1 (ജനുവരി എഡിഷൻ) ഫലം പ്രഖ്യാപിച്ചു. 20 വിദ്യാർഥികൾ ‘പെർഫെക്ട് 100’ നേടിയതായി നാഷനൽ ടെസ്റ്റിങ് ഏജൻസി അറിയിച്ചു. സൂക്ഷ്മ പരിശോധനക്കുവേണ്ടി 50 പേരുടെ ഫലം തടഞ്ഞുവെച്ചിട്ടുണ്ട്. jeemain.nta.nic.in എന്ന സൈറ്റിൽ ആപ്ലിക്കേഷൻ നമ്പർ നൽകി ഫലം അറിയാം.

ജനറൽ വിഭാഗത്തിൽ 14 ​പേരും ഒ.ബി.സിയിൽ നാലും എസ്.സി, ഇ.ഡബ്ല്യൂ.എസ് വിഭാഗങ്ങളിൽ ഓരോരുത്തരും വീതമാണ് ഏറ്റവും മികച്ച വിജയം ​നേടിയത്.

ജനുവരി എഡിഷനിൽ അഞ്ച് ചോദ്യങ്ങൾ ഒഴിവാക്കിയാണ് ഫലം പ്രഖ്യാപിച്ചത്. 8.6 ലക്ഷം പേരാണ് പരീക്ഷയെഴുതിയത്.

ഏപ്രിൽ 6, 8, 10, 11,12 തീയതികളിൽ നടക്കുന്ന സെഷൻ രണ്ടിന് അപേക്ഷ സ്വീകരിച്ചുതുടങ്ങിയിട്ടുണ്ട്. മാർച്ച് ഏഴുവരെ അപേക്ഷിക്കാം. കൂടുതൽ വിവരങ്ങൾ jeemain.nta.nic.in വെബ്സൈറ്റിൽ ലഭിക്കും.