നൂറുകണക്കിന് നാളികേരങ്ങൾ ചുമന്നുകൊണ്ട് അഭിമാനപൂർവം തലയുയർത്തി നിൽക്കുന്ന കേരവൃക്ഷങ്ങൾ നമ്മുടെ നാട്ടിലെ സുന്ദരമായ കാഴ്ചയാണ്. എന്നാൽ ഈ തെങ്ങിനു ജന്മം നൽകിയ വിത്തുതേങ്ങയെ കുറിച്ച് പലപ്പോഴും നാം ഓർക്കാറില്ല. ഫലം കായ്ക്കുന്ന മിക്ക വൃക്ഷങ്ങളുടെയും അവസ്ഥ ഇതാണ്. ഇക്കാര്യം ഒരു ഉപമയിലൂടെ വിശുദ്ധ ഖുർആൻ വിവരിക്കുന്നത് കാണുക.
അല്ലാഹുവിന്റെ മാർഗത്തിൽ ധനം ചെലവഴിക്കുന്നവരുടെ ഉപമ ഒരു വിത്ത് പോലെയാണ്. ആ വിത്ത് ഏഴു കതിരുകളെ ഉൽപാദിപ്പിച്ചു. ഓരോ കതിരിലും നൂറ് വിത്തുധാന്യങ്ങളുമുണ്ട്. അല്ലാഹു ഉദ്ദേശിച്ചവർക്ക് ഇതിലധികവും ഇരട്ടിയായി നൽകുന്നു (അൽ ബഖറ).
വിശുദ്ധ റമദാൻ മാസത്തിൽ ഒരു സുന്നത്തായ കാര്യം ചെയ്താൽ നിർബന്ധ കാര്യം ചെയ്ത പ്രതിഫലവും നിർബന്ധകാര്യം ചെയ്താൽ ഇതരസമയങ്ങളിൽ എഴുപത് ഫർളുകൾ ചെയ്ത പ്രതിഫലവും ലഭിക്കുമെന്ന് നബിവചനങ്ങളിൽ കാണാം. സുകൃതങ്ങൾ ചെയ്യുന്നവരുടെ ആത്മാർഥതയും സവിശേഷ സാഹചര്യങ്ങളുമാണ് പരിഗണനാർഹമാകുന്നത്. തെറ്റുകൾ ചെയ്യുന്നവർക്കും ഈ മാനദണ്ഡം ബാധകമാക്കാം. വളർത്തുപൂച്ചയ്ക്ക് ഭക്ഷണം നൽകാതെ കെട്ടിയിട്ട സ്ത്രീ നരകത്തിൽ പോകേണ്ടിവന്നതും നായയുടെ ദാഹം തീർത്ത പെണ്ണ് സ്വർഗത്തിൽ എത്തിയതുമായ സംഭവങ്ങൾ ഹദീസുകളിൽ പരാമർശിക്കുന്നുണ്ട്. ഫർള് നിസ്‌കാരങ്ങൾ കഴിഞ്ഞാൽ ശ്രേഷ്ഠമായത് രാത്രിനിസ്‌കാരങ്ങളാണ് എന്ന് അബൂഹുറൈറ (റ) പറയുന്നുണ്ട്. അതുകൊണ്ടുതന്നെ പുണ്യമാസത്തിൽ തറാവീഹ് ഉൾപ്പെടെയുള്ള രാത്രിനിസ്കാരങ്ങൾ നിർവഹിക്കാൻ നാം മുന്നിട്ടിറങ്ങേണ്ടതുണ്ട്.
ഗുഹയിൽ അകപ്പെട്ടുപോയ മൂന്ന് ആളുകൾ നടത്തിയ പ്രാർഥനയും ഇവിടെ ഓർക്കാവുന്നതാണ്. ഇത്തരം പിടികയറുകൾ വല്ലതും നാം ഒരുക്കിവച്ചിട്ടുണ്ടോ എന്നതും ചീന്തിക്കേണ്ടതുണ്ട്. കോടികൾ കൈവശമുള്ളവർ ചെയ്യുന്ന ധർമവും സാധാരണക്കാർ ചെയ്യുന്ന വിയർപ്പിന്റെ നനനുള്ള ധർമവും തുല്യമാവുകയില്ലല്ലോ.