ന്യൂഡൽഹി
ഇന്ധനവില വർധനവിനെ തുടർന്ന് കഴിഞ്ഞ എട്ടു വർഷം കൊണ്ട് മോദി സർക്കാർ ഒരു കൂടുംബത്തിൽ നിന്ന് 10 ലക്ഷം രൂപയുടെ ഇന്ധനനികുതി പിരിച്ചതായി കോൺഗ്രസ് നേതാവും മുൻ ധനമന്ത്രിയുമായ പി. ചിദംബരം. എട്ടു വർഷം കൊണ്ട് മോദി സർക്കാർ 26,51,919 കോടിയുടെ ഇന്ധന നികുതിയാണ് പിരിച്ചതെന്ന് അദ്ദേഹം ട്വീറ്റ് ചെയ്തു. ഇന്ത്യയിൽ 26 കോടി കുടുംബങ്ങളാണ് ഉള്ളത്. അതു പ്രകാരം ഒരു കുടുംബത്തിൽ നിന്ന് എട്ടു വർഷത്തിനിടെ 10 ലക്ഷം രൂപ വീതമാണ് ഇന്ധനനികുതിയായി കേന്ദ്ര സർക്കാർ ഈടാക്കിയതെന്നും അദ്ദേഹം പറഞ്ഞു.

ഇന്ധനവില വർധനയുമായി ബന്ധപ്പെട്ട് ലോക്‌സഭയും കഴിഞ്ഞ ദിവസം നിർത്തിവച്ചിരുന്നു. പ്ലക്കാർഡുകളുമായി പ്രതിപക്ഷം നടുത്തളത്തിൽ ഇറങ്ങിയതിനെ തുടർന്ന് ചോദ്യോത്തര വേളയും ശൂന്യവേളയുമാണ് തടസ്സപ്പെട്ടത്.