വിമർശന സാധ്യതയ്ക്ക് ഒരുമുഴംമുന്നേ മറുപടി
പ്രത്യേക ലേഖകൻ
കണ്ണൂർ
സി.പി.എം പാർട്ടി കോൺഗ്രസിൽ സിൽവർ ലൈനിനെതിരേ ഉയരാൻ സാധ്യതയുള്ള വിമർശനങ്ങൾക്ക് ഒരുമുഴം മുന്നേ മറുപടിയുമായി മുഖ്യമന്ത്രി പിണറായി വിജയൻ. പാർട്ടി കോൺഗ്രസ് ഉദ്ഘാടനവേദിയിൽ സംഘാടകസമിതി ചെയർമാൻ എന്ന നിലയിൽ നടത്തിയ സ്വാഗതപ്രസംഗത്തിലാണ് അദ്ദേഹം സിൽവർ ലൈനിനെക്കുറിച്ചു പരാമർശിച്ചത്.
പദ്ധതിക്ക് കേന്ദ്രാനുമതി നേടിയെടുക്കാൻ എല്ലാ ശ്രമവും നടത്തുമെന്ന് അദ്ദേഹം പറഞ്ഞു. ഭൂമി നഷ്ടമാകുന്നവർക്ക് ഉചിതമായ നഷ്ടപരിഹാരം നൽകും. വികസന പദ്ധതികൾക്കൊപ്പം പരിസ്ഥിതിയും സംരക്ഷിക്കും. വസ്തുതാപരമല്ലാത്ത ആരോപണങ്ങളുയർത്തി പദ്ധതി തകർക്കാനാണ് പ്രതിപക്ഷം ശ്രമിക്കുന്നത്. എത്രയുംവേഗം പദ്ധതി നടപ്പാക്കാനാണ് ശ്രമം. പദ്ധതിയെക്കുറിച്ച് ജനങ്ങൾക്കിടയിൽ ബോധവൽകരണം നടത്തുന്നുണ്ടെന്നും അദ്ദേഹം പറഞ്ഞു.
മുംബൈ- അഹമ്മദാബാദ് ബുള്ളറ്റ് ട്രെയിൻ പദ്ധതിക്കെതിരേ മഹാരാഷ്ട്രയിൽ സി.പി.എം സമരത്തിലാണ്. സമരത്തിന് നേതൃത്വം നൽകുന്ന നേതാക്കൾ പ്രതിനിധി സമ്മേളനത്തിൽ പങ്കെടുക്കുന്നുണ്ട്. അവരടക്കം ചില സംസ്ഥാനങ്ങളിൽനിന്നുള്ള പ്രതിനിധികൾ പദ്ധതിക്കെതിരേ വിമർശനമുയർത്താനിടയുണ്ട്.